EKONOMIA, HEADLINE

IGEADE, I.P preparadu hasai sedimentasaun sira iha kapitál Dili

IGEADE, I.P preparadu hasai sedimentasaun sira iha kapitál Dili

Prezidente Institutu Jestaun Ekipamentu no Apoiu Dezenvolvimentu Infraestrutura, Institutu Públiku (IGEADE,I.P), Ermenegilda da Costa Laurentina. Imajen Tatoli/Francisco Sony

DILI, 20 janeiru 2023 (TATOLI)— Prezidente Institutu Jestaun Ekipamentu no Apoiu  Dezenvolvimentu Infraestrutura, Institutu Públiku (IGEADE,I.P), Hermenegilda da Costa Laurentina, hateten, ekipa IGEADE,I.P preparadu prontu hasai sedimentasaun sira iha mota kapitál Dili.

“Ko’alia kona-ba sedimentasaun ba mota no bee-dalan sira iha kapitál ita-nia brigada destaka hela no mákina pezadu iha hela, ne’ebé buat ruma ita sempre atende ho lalais,” Hermenegilda da Costa Laurentina, hateten iha Palásiu Governu Dili, sesta ne’e.

Nia dehan, IGEADE,I.P rasik sempre preparadu iha situasaun saida de’it, tanba ko’alia kona-ba normalizasaun ne’e iha prosesu rua, mak parte pedidu normal tam aba prosesu naruk oituan, maibé iha tempu udan no iha  emerjénsia nia laran  ekipa sempre tun imediata hafoin relata relatóriu.

“Kona-ba mákina pezadu ne’e rasik, ita sufisiente tanba iha Dili mákina pezadu barak liu kompara ho munisípiu sira, tanba kobre servisu barak liu to’o Ataúro no kobre mos atividade aluga ba kompañia privadu sira,” nia dehan.

Nia afirma, iha tinan 2016 bainhira IGE sai IGE,I.P to’o agora sai IGEADE,I.P sosa mákina pezadu hamutuk 106 unidade. Hosi númeru ne’e agora sei iha kondisaun di’ak hamutuk 101 unidade, no iha unidade lima mak kondisaun ladi’ak.

Maibé, nia dehan antes ne’e mós Governu Japaun fó doasaun mákina hamutuk 166 unidade inklui jeradór sira ne’ebé to’o agora funsiona di’ak hamutuk 28 no restu aat ona.

“Nune’e iha tinan kotuk Governu liuhosi Ministériu Obra Públika no IGEADE,I.P sosa tan mákina pezadu hamutuk unidade 15. Ida ne’e ita destaka ba munisípiu sira hodi responde pedidu komunidade,” nia hateten.

Jornalista : Arminda Fonseca

Editora     : Armandina Moniz

iklan
iklan

Leave a Reply

iklan
error: Content is protected !!