DILI, 20 janeiru 2023(TATOLI) – Diretór Ezekutivu Servisu Autónomu ba Medikmentu no Ekipamentu Saúde (SAMES), Santana Martins, hateten estoke (stock) larvisida ba kombate no kontrola susuk Aedes aegypti, susuk ne’ebé kauza dengue, sei sufisiente iha Armajen SAMES.
“Atu dehan de’it, estoke abate no malation [larvicida kontra susuk dengue] iha SAMES rasik sei to’o hela. Nune’e ami sei esforsu hodi labele mosu stockout iha sentru ho postu saúde hotu, liuhosi mantein kordenasaun no komunikasaun ne’ebé di’ak ho responsável unidade saúde sira nian”, Diretór Ezekutivu SAMES dehan ba jornalista sira iha nia kna’ar fatin, Kampu Alor, ohin.
Santana garante kímiku hirak ne’e sei bele utiliza hodi halo intervensaun ba moras dengue iha teritóriu nasionál to’o fulan tolu oin mai.
“Espera katak kazu dengue labele aumenta. Karik númeru moras aumenta, ita mós tenke intensifika atividade fumigasaun. Presiza mós atu esforsu hodi halo distribuisaun produtu larvisida ba populasaun afetadu sira”, afirma nia.
Tuir diretór SAMES, durante ne’e, Ministériu Saúde hetan mós apoiu husi Governu Austrália, liuhosi Department of Foreign Affairs and Trade (DFTA) no PHD hodi halo kompras ba podutu larvisida kontra dengue, ne’ebé mak armazenadu hela iha SAMES.
Jornalista: Felicidade Ximenes
Editór: Zezito Silva
