VIQUEQUE, 20 janeiru 2023 (TATOLI)-Vise Ministru Edukasaun Juventude no Desportu (MEJD), António Guterres, sesta ne’e, ofisialmente abertura prosesu aprendizajen ba tinan 2023 iha nivél munisípiu Viqueque.
“Ohin, ita halo halo abertura proseu apredizajen ba tinan 2023 iha nivél munisípiu Viqueque ba eskola sira hotu-hotu hahú Pre-Eskolár, ensinu Báziku, ensinu sekundariu jerál no Eskola Tékniku Vokasionál (ESTV)”, Antonio Guterres, hateten liu husi ninia diskursu iha abertura prosesu apredisajén iha, eskola sekundáriu jerál Paralelu Besi Kulit, sesta ne’e.
Nune’e, Governante ne’e husu ba profesor sira no dirijente eskola sira hotu iha munisípiu Viqueque atu hametin unidade hodi realiza prosesu aprendizajen la’o di’ak tuir kalendáriu tinan eskolár hosi MEJD.
“Ha’u ba husu estudante sira hadook an hosi viólensia. Ha’u-nia alin sira balun la’o ba eskola maka distánsia dook karik tenke ho pasiénsia tanba liu hosi ita-nia pasiénsia, maka ita foin atinje ita-nia mehi, nu’udar estudante ida, tenke respeitu ita-nia inan-aman sira, respeita ita-nia manorin sira no lideransa sira”, nia sujere.
Iha fatin hanesan, Diretór Serbisu Edukasaun munisípiu Viqueque, Brandão Soares, husu mós ba profesór sira atu hahú ativa iha eskola ida-idak hodi bele hala’o prosesu aprendizajen ho di’ak. hala’o aula prejensiál.
“Ba manorin sira atu hanorin ita-nia estudante sira ho di’ak no ha’u husu ba estudante sira ba eskola hodi tuir prosesu prejensiál ba tinan ida-ne’e nian”, nia sujere.
Jornalista: Vitorino Lopes da Costa
Editór : Florencio Miranda Ximenes
