DILI, 20 janeiru 2023 (TATOLI)—Primeiru Ministru (PM), Taur Matan Ruak, orienta Institutu Jestaun Ekipamentu no Apoiu Dezenvolvimentu Infraestrutura, Institutu Públiku (IGEADE,I.P), atu halo melloramentu hodi loke estrada foun sira iha área rurál ho objetivu hodi fasilita populasaun partisipa iha eleisaun parlamentár tinan ne’e ho diak.
“Ohin, ha’u mai tanba hetan konvite hosi Primeiru Ministru, hodi relata progresu servisu tinan 2022 nian, no simu orientasaun hosi PM Taur ne’ebé orienta ami kontinua servisu liuliu halo melloramentu ba estrada sira no kontinua loke estrada foun sira iha área rurál, ho objetivu atu fasilita ita-nia komunidade partisipa eleisaun parlamentár ne’ebé sei akontese iha tempu badak,” Prezidente IGEADE, I.P, Hermenegilda da Costa Laurentina, hateten ba jornalista sira iha Palásiu Governu, Dili, sesta ne’e.
Nia dehan, ho orientasaun PM Taur nian ba IGEADE ne’e ba oin sira-nia parte sei halo esforsu másimu nune’e, iha atividade eleisaun ne’e komunidade bele asesu dalan ho di’ak.
“Ba eleisaun parlamentar nian dalan sira ne’ebé mak hosi nasionál to’o iha área remota hosi IGEADE,I.P nian sei haree dalan balu ne’ebé seidauk iha ami koko atu loke dalan ba asesu no melloramentu estrada ne’ebé iha parte hosi instituisaun relevante atu lori urna to’o fatin sira iha área remota. Ida ne’e mak preparasaun IGEADE,I.P nian,” nia dehan.
Nia dehan, atu ezekuta orientasaun sira hosi PM Taur ne’e mak, antes ne’e IGEADE,I.P mós lansa ona brigada lima inklui ekipa task force ida hodi atende situasaun emerjénsia no pedidu komunidade nian iha terrenu hodi halo manutensaun estrada sira iha área rurál.
Nia dehan, aleinde sira-nia parte halo melloramentu ba estrada sira iha área rurál tuir orinetasaun PM nian, IGEADE,I.P mós tinan ne’e sei servisu kontinua nafatin halo melloramentu ba estrada sira hanesan, atividade balu loke estrada no melloramentu estrada iha Ataúro aldeia Loroana, no ida tan halo melloramentu estrada iha Remexio nian parte Palásiu Governu Saudozu Nicolau Loubato nian, nomós ida iha parte Maliana, Unidade Polísia Fronteira (UPF) no seluk tan.
Jornalista : Arminda Fonseca
Editora : Armandina Moniz
