VIQUEQUE, 21 janeiru 2023 (TATOLI)—Prezidente loke eskola paralelaa sekundáriu Sabika Besi Kulit, Filomena de Jesus, reprezenta komunidade hato’o agradesimentu ba Ministériu Edukasaun Juventude no Desportu ne’ebé deside loke eskola sekundária Paralela Sabika Besi Kulit ba estudante hosi suku tolu iha postu addministrativu Uautulari, munisípiu Viqueque.
“Ha’u reprezenta inan-aman hakarak agradese ba Ministériu Edukasaun ne’ebé deside hodi ami loke eskola paralelu ida-ne’e, tanba kuaze tinan naruk ami-nia laran ami-nia oan sira tenke la’o ho distánsia dook hafoin asesu ba eskola sekundáriu. Nunee’’ee, ha’u agradese ba inan-aman, autoridade lokál no veteranu sira-ne’ebé fó apoiu no tulun ita-nia oan sira agora daudaun eskola iha ne’e atu estudante sira bele estuda di’ak hodi bele hetan bolsa merítu,” Filomena de Jesus, hateten hafoin abertura eskola sekundáriu Paralelu Sabika Besi Kulit, iha postu antigu Uatulari, sesta (20/01).
Nia husu ba estudante sira atu esforsu hodi estuda tanba daudaun ne’e eskola besik hela fatin, nune’e estudante sira tenke aproveita hodi estuda no apreende matéria sira-ne’ebé mak profesór sira hanorin iha sala-de-aula.
Eskola senkundáriu Paralelu Sabika Besi Kulit loke abertura ofisiál husi Vise Ministru Edukasaun Juventude no Desportu (MEJD), Antonio Guterres, no akompaña ho asesor jurídiku MEJD, diretór servisu edukasaun munisípiu Viqueque no adiministradór postuadministradór Uatulari.
Iha abertura ne’e Vise MEJD, Antonio Guterres, hateten Governu liuhosi MEJD deside loke ona eskola sekundária Paralela ida-ne’e no nia husu inan-aman estudante nian tenke esforsu hamutuk ho profesór sira hadi’a resintu eskola nian sai verde atu estudante sira bele eskola ho di’ak.
“Ohin ita loke tan ona eskola paralela ida iha ne’e, ha’u husu ba inan-aman, profesór no estudante sira tenke servisu hamutuk hodi kria ambiente ne’ebé di’ak. Tanba durante ne’e inan-aman no estudante preokupasaun mak distánsia ba eskola dook. Maibé, estabelese ona eskola sekunária paralela ona, nune’e agora ba oin ita tenke haree fali ba sustentablidade eskola nian, labele hanoin eskola loke ona ne’ebé hatama ema voluntáriu barak, ida-ne’e ha’u lakohi. Ita loke eskola la’ós oportunidade ida, harii sentru ba edukasaun la’ós sai oportunidade ida,” Governante ne’e hateten.
Reprezentante estudante, Feliciana da Silva Tavares, sente kontente tanba bele loke ona eskola sekundária Paralela tanba estudante sira atu hakat ba eskola iha eskola senkundária sentrál Sabika Besi Kulit ho distánsi kilometru lima.
“Ho ida-ne’e ami husu agradese ba nai-ulun sira tanba bele dada besik eskola ba ami-nia fatin, hodi ami bele la’o besik ba eskola. Antes ne’e ami-nia maun sira ba eskola iha eskola sekundariu Sabika Besi Kulit ho distánsia dook tebe-tebes mak foin asesu ba eskola,” nia dehan.
Entretantu, konstrui eskola sekundária Paralela Sabika Besi Kulit ne’e, komunidade iha suku Babulu ofisialmente entrega rai ektare haat (4) ba Governu liuhosi Ministériu Edukasaun Juventude no Desportu (MEJD) hodi harii edfísiu eskola iha futuru.
Eskola paralela sekundária Sabika Besi Kulit ne;e aseu hosi estudante hosi suku tolu hanesan Afaloicai, Babulo no Vessoru, ne’ebé hahú ho sala rua no ho totál estudante na’in-63, ne’ebé kompostu hosi siénsia sosiál na’in-33 no siénsia teknólojia na’in-30 no profesór hamutuk na’in-18 ho profesór permanente na’in-lima (5) no voluntáriu na’in-13.
Jornalista : Vitorino Lopes da Costa
Editór : Cancio Ximenes
