VIQUEQUE, 21 janeiru 2023 (TATOLI)—Partidu Kmanek Haburas Unidade Nasionál Timor-Oan (KHUNTO) apoia fundu ba sarani sira konstrui kapela kapela Sagrado Corasão de Jesus (Sacrojes) iha aldeia Loco-Loco no Lebadae, suku Matahoi, postu adiministrativu Uatulari, munisípiu Viqueque.
Xefe bankada Khunto, Deputada Olinda Guterres, hateten partidu KHUNTO fó apoia orsamentu ba sarani sira iha Loco-Loco no Lebadae, tanba durante ne’e sarani sira la’o dook mak foin ba rona misa no dala ruma la ba tuir misa.
“Ohin, ha’u mai partisipa inaugurasaun kapela Loco-Loco no Lebadae la’ós mai halo kontaktu eletorál maibé ami mak fó apoia orsamentu hodi hari’i kapelle ne’e. Tanba, uluk ha’u mai iha ne’e husu sarani sira, tempu loron boot imi ba rona misa iha ne’ebé, depois sarani sira hatán dehan dala ruma ami la ba tanba distánsia dook bainhira mota Bebui tun ne’e, ami la ba misa. Ho ida-ne’e ha’u fó osan uitoan ba sira hodi konstrui kapela ida-ne’e ba sira, atu sarani sira tempu loron boot sira bele rona misa iha ne’e,” Deputada Olinda Guterres hateten ba jornalista sira, hafoin partisipa inaugurasaun kapela, sesta (20/01) ne’e.
Maske kapela ida-ne’e konstrui ona no hetan bensaun ona maibé kondisaun seidauk kompleta hanesan plafon seidauk taka, nune’e sei kontinu fó apoia hodi taka hotu plafon iha kapela laran ne’e.
Xefe suku Matahoi, Antonio Amaral, hato’o agradese ba partidu KHUNTO ne’ebé foti desizaun hodi fó apoia orsamentu hari’i kapela ba sarani sira iha Loco-Loco no Lebadae atu sarani sira bele asesu misa iha loron boot ruma.
“Antes ne’e Loco-Loco kapela harii ona iha tinan 1993maibé iha tinan 2003 muda fali mai iha área Lebadae, maibé kondiasuan aat tiha no animál sira mós tama hodi estraga tiha sasán sira iha kapela laran. Ha’u nu’udar autoridade husu agradese ba partidu KHUNTO liu-liu deputada Olinda Guterres ne’ebé mai direta haree kondisaun kapela. Maske aban bain-rua sarani sira iha ne’e, la selu sira-nia favór maibé Maromak sei selu sira-nia favór,” nia hateten.
Inaugurasaun ba kapela Sagrado Corasão de Jesus Loco-Loco ne’e, inaugura hosi Pároku Uatulari no hetan partisipasaun másimu hosi estrutura partidu KHUNTOo no sarani sira iha aldeia Loco-Loco no Labadae.
Jornalista : Vitorino Lopes da Costa
Editór : Cancio Ximenes
