DILI, 22 janeiru 2023 (TATOLI) – Komunidade Xineza iha Timor-Leste selebra, iha loron Domingu ne’e, tinan foun Xineza 2023 ne’ebé marka ho koellu (ka tinan koellu–hahú husi 22 janeiru 2023 to’o 9 fevereiru 2024).
Tuir tradisaun ema Xina, koellu nu’udar símbolu vida naruk, páz no prosperidade.
Nune’e, Prezidente Assosiasaun Komersiál Komuidade Xieneza Timor Oan, Kathleen Gonçalves, kompromete, iha tinan ne’e “komunidade xineza iha Timor-Leste hakarak sai pareiru di’ak no hametin liután kooperasaun ho Governu rai ida ne’e hodi kontribui ba dezenvolvimentu nasional”.
Atividade hirak ne’ebé inklui iha festa komemorasaun ne’e mak: reza hamutuk ka sembahyang (nu’udar meiu hodi hato’o orasaun tuir fiar no kustume ema xinez sira) iha Xina Maromak Formoza Dili, vizita ba Embaixada Xina iha Timor-Leste, loja xina sira iha Díli, ne’ebé sei hakotu iha Semitériu Xina Rate, Taibesi, akompaña ho marsa Dragon Dance.
“Ohin loron primeiru ba kalendáriu Xineza ka anu novu Xineza nian ne’ebé selebra ba dala-4100 tuir tradizasaun Xineza nian. Ami mai halo Sembahyang iha Xina Maromak, Formoza, atu husu bensaun, tuir konstume no tradizaun Xineza iha mundu tomak”, explika Kathleen Gonçalves ba jornalista sira, bainhira remata reza hodi komemora tinan foun Xina, Domingu ne’e, iha Formoza Dili.
Jornarlista: Natalino Costa
Editór: Zezito Silva
