DILI, 22 janeiru 2023 (TATOLI) – Prezidente Repúblika (PR), José Ramos, sei konvoka reuniaun iha tempu badak nia-laran ho partidu polítiku sira molok, dekreta loron eleisaun parlamentár.
“Enkontru ho partidu polítiku sira ne’e, hahú daudauk ona maibé sei informal, rona tiha ona balun. Maibé iha tempu badak ha’u sei hahú konsulta formál ho partidu polítiku tanba husi lei tenke halo no rona partidu polítiku sira asentu iha Parlamentu Nasionál”, Prezidente Repúblika, José Ramos, informa hafoin fila hosi Suíça, iha Aeroportu Internasionál Nicolau Lobato.
José Ramos Horta hateten atu deside kalendáriu ba eleisaun parlamentár presiza konsuta ho partidu polítiku sira tuir lei haruka.
“Prosesu ne’e la’os de’it legál maibé prosesu ne’e mós polítiku, ita haree data ne’e mós tenke fleksível maibé tempu ne’ebé di’ak liu ba ita. Ita sei haree no antisipa buat balun, maibé buat sira ne’e hotu labele viola lei ne’ebé hateten katak kada lejislatura tinan lima. Purtantu prosesu hahú ona, ita hatene fulan rua tán eleisaun”, salienta nia.
Nia dehan preparativu ba eleisaun nian iha semana hirak liuba, nudar Xefe Estadu ko’alia tiha ona ho Komisaun Nnsionál Eleisaun (CNE, sigla portugés) no Sekretaria Téknika Administrasaun Eleitorál (STAE).
“Lei klaru kona-ba kalendáriu eleisaun Parlamentu Nasionál no Governu iha tinan lima, maibé Parlamentu Nasionál maka hahoris Governu”, dehan Prezidente Repúblika.
“Purtantu ita labele menus, labele mais dúke tinan lima ne’e sagradu iha ita nia konstitusaun no Prezidente Repúblika mak marka loron eleisaun hafoin rona partidu polítiku sira, rona Governu depois maka Prezidente Repúblika foin marka loron eleisaun”,Xefe Estadu ne’e hakotu.
Jornarlista: Natalino Costa
Editór : Zezito Silva
