DILI, 23 janeiru 2023 (TATOLI) – Komandante Tránzitu Dili, Inspetór Domingos Sarmento Gama, husu atu kamiaum tula kontentór sira labele sirkula arbiru iha sidade Dili, atu nune’e bele prevene engarafamentu no asisdente rodoviáriu.
“Husu ba kompañia sira atu kumpre despaixu konjuntu hosi Ministériu Interiór no Ministériu Transporte no Komunikasaun ne’ebé antes ne’e hasai ona hodi regula oráriu movimentu veíkulu sira, liuliu karreta bo’ot hirak ne’ebé tula kontentór, iha kapitál Dili, nune’e labele provoka engarafamentu no asidente tráfegu”, Komandante Tránzitu Dili, Inspetór Domingos Sarmento Gama, apela ba jornalista sira iha nia kna’ar fatin, Caicoli, segunda ne’e.
Despaixu kona-ba regularizasaun oráriu sirkulasaun karreta tula kontentór sira tama ona iha vigór dezde 01 fevereiru 2021, ho probisaun sira hanesan tuir mai: bandu kamiaun tula kontentór sira atu halo operasaun iha oras sira hanesan: parte deder – entre tuku 07h00 no tuku 09h00, meudia husi tuku 12h00 to’o 14h00 no loraik husi 17h00 to’o 21h00.
“Se kompañia sira kontra oráriu refere maka ami sei aplika despaixu konjuntu artigu 10.º kona ba kompañia ne’ebé autoriza sira nia karreta bo’ot tula kontentór iha oras mak probidu sei selu koima ho totál dolar amerikanu 75. No karik empreza sira abuza nafatin maka ita sei rekore ba artigu 57.º husi Lei Kódigu Estrada, ne’ebé mak prevê pagamentu multa husi dolar 50 to’o dolar rihun tolu”, esplika Domingos.
Tuir komandante ne’e, iha inísiu fulan janeiru, iha empreza xineza balun halo pedidu ba Komandu Munisipál Dili hodi husu autorizasaun atu sira nia kamiaun tula kontentór bele sirkula iha oras ne’ebé la determinadu, tanba sira halo hela projetu bo’ot balu iha Dili no fora hosi Dili. Despaixu refere hetan aurotizasaun.
“Maibé ba sira seluk ne’e, ami husu atu kumpre nafatin despaixu konjuntu ne’ebé maka iha ona, se la kumpre ami nia ekipa Sesaun Tránzitu Dili sei halo apreensaun hodi lori mai iha edifísiu Komandu Dili hodi aplika multa ba sira”, alerta Sarmentu .
Jornalista: Natalino Costa
Editór : Zezito Silva
