iklan

HEADLINE, MUNISÍPIU, OÉ-CUSSE (RAEOA), SOSIEDADE SIVĺL

Don Virgílio Kardeál inaugura kapela São Francisco Xavier iha Lifau

Don Virgílio Kardeál inaugura kapela São Francisco Xavier iha Lifau

Don Virgílio Kardeál do Carmo da Silva, inaugura kapela São Francisco Xavier iha suku Lifau, RAEOA. Imajen Tatoli/ Abílio Elo Nini.

OÉ-CUSSE, 24 janeiru 2023 (TATOLI) – Don Virgílio Kardeál do Carmo da Silva, tersa ne’e inaugura kapela São Francisco Xavier, Oémolo iha suku Lifau, sub-rejiaun Pante Makasar, Rejiaun Administrativa Espesiál Oé-Cusse Ambeno (RAEOA).

Kapela São Fransisco Xavier, Oémolo, harii mai hosi inisiativa sarani sira iha suku Lifau, no hetan apoiu mós hosi Igreja Parókia Nosa Señora Dorosario Numbei.

Iha omília misa inugurasaun ne’e, Don Virgílio Kardeál do Carmo da Silva, parabeniza ba sarani suku Lifau, tanba ho inisiativa bele hamutuk hodi hadi’a kapela São Francisco Xavier, nu’udar fatin ba sarani sira atu reza ba Nai Maromak no mós fatin simu sakramentu nu’udar sarani Katólika.

“Kapela ne’e fatin atu ita bele harohan, fatin hasoru malu atu reza no fatin ba ita hodi rona Maromak nia liafuan, no fatin ba sarani hotu atu simu sakramentu eukarístia, batizmu no sakramentu seluk tán, ne’e duni kapela ita bele dehan katak, ba ita sarani ida-ne’e maka igreja horik Nai Maromak ninian,” Kardeál Virgílio do Carmo, ko’alia iha omília misa inaugurasaun ne’e.

Nia enkoraja sarani iha kapela Oémolo, ho esforsu no inisiativa ne’e presiza hatudu atetude ne’ebé di’ak tuir Maromak nia hanorin ona mai iha mundu, katak hadomi malu, perdua malu, no bainhira tama iha igreja fatin atu hasoru ho Nai Maromak presiza reja ho laran, husu tulun ba Maromak hodi hetan grasa lalehan nian.

Maske kapela ne’e furak, maibé igreja loloos mak sarani, tanba definisaun igreja maka sarani, ema-ne’ebé halibur hamutuk tan fiar iha Maromak, ita iha igreja bo’o kapaas furak, maibé sarani laiha mós sai sinál ita haluha vizita Maromak iha fatin ne’ebé babain ita halibur hamutuk bá.

Tanba Igreja maka manifesta ita-nia unidade, ita hotu mai hosi família oioin, grupu no knua oioin, maibé iha altár ida-ne’e nia leten iha kapela ida-ne’e, ita hotu fiar iha Maromak ida-de’it, Maromak aman, oan no espíritu santu, ida-ne’e maka sai sinál unidade ita-nian.

“Iha altár ohin ita inaugura ne’e, atu haklaken Maromak nia liafuan, ita hotu simu ai-han ida-de’it, no hosi altár ida-ne’e mós paun ne’ebé amu-lulik hasa’e iha latar ida-ne’e, maka sai ai-han esprirituál ninian ba ita hotu-hotu, ne’e duni keta haluha, ita iha isin ho raan loron ida sei hotu, maibé ita-nia klamar ne’e ka mate, esíritu ne’e la mate,” nia fó hanoin.

Iha biban ne’e, Prezidente Komisaun Organizadora, Crisantos Elo, informa, konstrusaun kapela harii mai hosi inisiativa komunidade suku Lifau, komposta hosi aldeia neen, no hetan apoia hosi Parókia Nosa Señora Dorosario Numbei, Oé-Cusse.

“Kapela ne’e harii iha tinan kotuk ho dursaun servisu fulan tolu, kontribuisaun ne’e mai hosi sarani sira konsege hamutuk fundu $5,500.00 no parókia Numbei apoia tán $450,00.00, ne’ebé konstrusaun ne’e nia gastu hamutuk $10,00.00,” nia katak.

Nia agradese Igreja Parókia Nosa Señora Dorosario Numbei, Oé-Cusse no ba sarani sira iha suku Lifau tomak, tanba liuhosi serbisu hamutuk, unidade no kooperasaun to’o iha mumentu inaugurasaun.

Jornalista   : Abílio Elo Nini
Editór          : Evaristo Soares Martins

iklan
iklan

Leave a Reply

iklan
error: Content is protected !!