iklan

EDUKASAUN, HEADLINE, MUNISÍPIU, VIQUEQUE

EBF Loco Loco iha Uatulari kondisaun grave

EBF Loco Loco iha Uatulari kondisaun grave

Kondisaun Ensinu báziku filiál (EBF) Loco Loco, lokaliza iha aldeia Lebadae, suku Matahoi, postu administrativu Uatulari, munisípiu Viqueque. Imajen Agência Tatoli/Vitorino da Costa Lopes.

VIQUEQUE, 24 janeiru 2023 (TATOLI) — Edifísiu Ensinu báziku filiál (EBF) Loco Loco, lokaliza iha aldeia Lebadae, suku Matahoi, postu administrativu Uatulari, munisípiu Viqueque, dadaun ne’e ho kondisaun grave.

Koordenadór EBF Loco Loco, Domingos Sarmento Lopes, informa, EBF Loco Loco hahú konstrui dezde 2008, sala tolu, didin ho bebak, ai-rin uza tinan 15, maibé dadaun ne’e uma-nia didin balu monu, kalen aat no ai rin uma nian aat, maske ho kondisaun aat profesor sira kontinua uza hodi hala’o prosesu apredizajen.

Kondisaun Ensinu báziku filiál (EBF) Loco Loco, lokaliza iha aldeia Lebadae, suku Matahoi, postu administrativu Uatulari, munisípiu Viqueque. Imajen Agência Tatoli/Vitorino da Costa Lopes.

“Ami-nia eskola kondisaun aat ona, didin sira ne’e monu ona, maibé ami uza hodi hanorin ita-nia oan sira. Iha tempu udan no anin-boot ami tenke hapara prosesu apredizajen tanba ta’uk uma monu ba estudante sira-nia leten. Tanba ne’e, mak ami deside tenke hapara prosesu prosesu prezensial,” Koodenadór EBF Loco Loco, hateten ba jornalista sira, iha edifísiu EBF Loco Loco, tersa ne’e.

Ho kondisaun edifísiu EBF Loco Loco nia dehan, profesór sira halo ona pedidu ba serbisu edukasaun munisípiu Viqueque hodi halo reabilitasaun eskola EBF ida-ne’e tanba edifísiu la permite.

“Ami-nia hakarak eskola ne’e halo ona reabilitasaun hodi bele fó seguru ba ami (professor) no ba estudante sira. Ami esforsu halo pedidu ba edukasaun hodi tau ba atensaun. Espara katak iha 2023 ami-nia eskola Governu bele tau ba konsiderasaun,” nia katak.

Kondisaun Ensinu báziku filiál (EBF) Loco Loco, lokaliza iha aldeia Lebadae, suku Matahoi, postu administrativu Uatulari, munisípiu Viqueque. Imajen Agência Tatoli/Vitorino da Costa Lopes.

Diretór serbisu edukasaun munisípiu Viqueque, Domingus Brandão, rekoñese EBF Loco Loco ninia realidade kondiasaun ne’ebé grave tebes.

“Grasa uain tinan ida-ne’e Viqueque hetan projetu komunitáriu 11, ami sei aloka ida ba eskola ne’ebá. Nune’e ha’u husu ba koordenadór eskola no komunidade sira kria lalais grupu hodi aprezenta ba ami, atu sira sai responsável ba konstrusaun refere,” nia katak.

EBF Loco Loco ho totál estudante hamutuk na’in-60, klase 1 to’o klase 6 no profesor hamutuk na’in-neen.

Jornalista   : Vitorino Lopes da Costa
Editór         : Evaristo Soares Martins

iklan
iklan

Leave a Reply

iklan
error: Content is protected !!