iklan

COVALIMA, POLÍTIKA

Estrada iha Fatumea monu kuaze kilometru 20

Estrada iha Fatumea monu kuaze kilometru 20

Estrada ligasaun suku Fatumea ba postu administrativu Fatumea no Fohorem monu kuaze metro 20. Imajen/Espesiá

COVALIMA, 24 janeiru 2023 (TATOLI)– Klibur Estudante Juventude Fatumea (KEJUFAT), Rui Amaral, hateten estrada iha suku Fatumea ne’e monu kuaze kilometru 20 hodi difikulta movimentu transporte públiku hosi Fatumea ba postu Fohorem ba-mai kapitál Suai.

Ho nune’e, Klibur Estudante Juventude Fatumea (KEJUFAT) liu-husi ninia ekipa kria sorumutu internál ho organizaun suku Fatumea ho naran Unidade Estudante no Intelektual Suku Fatumea (UNEISFAT) halo diskusaun no hato’o ona pedidu emerjénsia ba Ministru Obra Públiku (MOP) no Institutu Jestaun Ekipamentu (IGE-Sigla Portugés).

Rezultadu hosi pedidu ne’e iha loron 10 janeiru 2023 no hetan despaixu hosi Ministru Obra Publiku (MOP), Abel Pires da Silva, iha loron 12 fulan-janeiru 2023.

“Ami-nia karta ne’e, Ministru Obra Públika hasai ona despaixu hatun ona ba prezidente IGE iha loron 12 liu ba, maibé agora Prezidente IGE sei pendente hela iha nia fatin,” Rui Amaral Fátima hateten ba Agência tatoli liuhosi telefónika, tersa ne’e.

Kontéudu hosi karta ne’e, husu atu halo normalizasaun ba estrada ne’ebé monu iha suku Fatumea ne’e ho urjente, liu-liu iha aldeia Fatumea, postu administrativu Fatumea, munisipiu Covalima tanba tanba difikulta movimentu transporte públiku ba-mai.

Maske Ministériu Obra Públika (MOP) hatun ona despaixu, ba IGE maibé to’o ohin loron IGE seidauk halo normalizasaun.

“Ami preokupa ho situasaun hirak ne’e, mak ami hakarak fanun na’i-ulun sira atu labele husik povu balun moris iha terus no susar laran. Tanba iha sorin seluk ami ladún satisfa tanba despaixu sai ona iha loron 12 janeiru liubá, maibé to’o agora Ekipa hosi IGE seidauk to’o fatin akontesimentu. Ami-nia preokupasaun hirak-ne’e la nesesáriu atu tulun. Tanba ne’e, husu tau konsiderasaun ba preokupasaun ne’e ho seriedade,” nia dehan.

Nune’e, komunidade no juventude iha Fatumea tau esperansa ba Governu liuhosi IGE iha tempu badak, ekipa hosi IGE bele halo ona normalizasaun ba estrada ne’ebé aat iha suku Fatumea, aldeia Fatumea, postu administrativu Fatumea.

Xefe suku Fatumea, Julio da Costa Nunes, klarifika estrada monu iha suku Fatumea ne’e kuaze 20 resin, ne’ebé durante komunidade uza hodi halo movimentu ligasaun ba postu administrativu Fatumea.

“Estrada ne’e monu besik metru 20 resin, ida-ne’e ami uza hodi la’o hosi suku Fatumea ba postu  no mós hosi postu Fatumea ba postu Fohorem. Agora karreta labele liuhosi ne’e besik fulan ida ona,” nia dehan.

Nia informa, estrada aat kuaze metru 20-resin alende mós komunidade agrikultura nia to’os besik metru 10-resin hodi estraga maek ne’ebé iha to’os laran.

Ho nune’e, Servisu Munisipál Obra Públiku ba halo observasaun no sukat ona estrada ne’ebé aat inkului monu ne’e hamutuk metru 200-resin. maibé to’o agora seidauk iha mákina pezadu mak Governu dezloka ba Fatumea hodi halo normalizasaun ba estrada refere.

Xefe suku ne’e husu nafatin ba Governu liuhosi IGE atu bele tun lalais ba terreñu hodi halo normalizaun ba estrada ne’e para komunidade bele utiliza fali hanesan baibain.

“Obra Públiku hosi munisípiu mai sukat ona iha loron 09 ne’e, ami sukat hamutuk metru 250, hafoin sira dehan sukat hotu sei haruka ba nasionál hafoin mak IGE mai fali normaliza maibé to’o agora IGE seidauk halo normalizasaun ho nune’e transporte públiku lahalo ona movimentu durante fulan ida ona,” nia hateten.

Jornalista : Celestina Teles

Editór      : Cancio Ximenes

iklan
iklan

Leave a Reply

iklan
error: Content is protected !!