iklan

EKONOMIA, HEADLINE, INKLUZAUN SOSIÁL, MUNISÍPIU, VIQUEQUE

Komunidade Viqueque preokupa kondisaun dalan Lugatoi

Komunidade Viqueque preokupa kondisaun dalan Lugatoi

Empreza CRIG-COVEC normaliza hela dalan Lugatoi ne’ebé kotu iha semana kotu, segunda (03/10). Imajen Tatoli/Vitorino Lopes da Costa.

VIQUEQUE, 24 janeiru 2023 (TATOLI) – Komunidade hosi postu administrativu Viqueque Vila, munisípiu Viqueque preokupa ho kondisaun dalan Lugatoi ne’ebé  kontinua fó ameasa movimentu transporte públiku tanba daudaun atu besik kotu fila-fali.

“Ha’u nu’udar Viqueque oan sente triste no preokupa tebes tanba durante ne’e dalan ligasaun entre Viqueque ba Dili ne’ebé atu besik kotu. Tán ne’e husu ba autoridade munisípiu no Ministériu Obra Públika (MOP), karik iha hanoin hadi’a dalan ne’e,” Reprezentante komunidade munisípiu Viqueque,  João Monteiro, hateten ba Agência Tatoli, iha dalan Logatoi, tersa ne’e.

Banhira dalan Lugatoi kotu difikulta transporte públiku halo movimentasaun tanba seidauk iha dalan alternativa ida no seidauk rezolve dalan Logatoi.

Estrada Lugatoi hahú kotu iha loron 29  setembru   2022, tuku 14:00,  momentu ne’ebá fó impaktu uluk tansporte públiku  sira  no labele halo movimentu. Nune’e iha momentu dalan ne’e kotu ekipa hosi MOP tun hodi haree kondisaun dalan no husu kedas apoia hosi empreza Xinés CRIG-COVEC halo normalizasaun ba dalan Lugatoi.

Nune’e iha loron 03 outubru 2022 empreza Xinés Covec  destaka kedas  ekipamentu pezadu hodi suru rai mutin hodi ateru ba rai kuak.

Administradór munisípiu Viqueque, Januário Soares “Bolly”, hateten, dalan liga ba Lugatoi responsável ba nasionál, maske munisípiu Viqueque aloka orsamentu ba MOP Viqueque, maibé orsamentu ida-ne’e atu responde dezastre naturál. Enkuantu estrada Lugatoi sei tama ba  prosesu konkursu públiku ba empreza internasionál sira.

“Dalan Lugatoi kada tinan kontinua fó ameasa ba ita-nia transporte públiku sira. Foin lalais ha’u husu ba diretór obra públika Viqueque halo pedidu ba  Ministériu Obra Públiku hodi autoriza Institutu Jestaun Ekipamentu, Institutu Públiku (IJE.I,P) halo intervensaun. Pedidu ne’e konsege halo maibé empreza Xinés Covec maka ateru agora monu fila-fali. Nune’e ha’u kontinua fó hatene ba Obra Públika Viqueque loke dalan alternativu,” Autoridade Viqueque  ne’e akresenta.

Notísia relevante:https://tatoli.tl/2023/01/21/karreta-hilux-ida-hetan-asidente-iha-area-lugatoi-viqueque-vila/

Diretór serbisu obra públiku munisípiu Viqueque, Mário do Rego, haktuir dalan Lugatoi rai halai hosi mota laran maka afeta ba estrada, nune’e la’ós munisípiu de’it maka responde, maibé nasionál mós tau matan hotu estrada Lugatoi.

“Parte munisípiu Viqueque hakarak maka loke dalan alternativu, maibé orsamentu aloka mai ami $ 30.000 atu responde ba emerjénsia sira, maibé orsamentu la sufisente hodi rezolve dalan Lugatoi. Ha’u mós haree katak estrada Lugatoi hela metru ida atu kotu,” nia katak.

“Agora ne’e maka dalan Lugatoi kotu, ami sei uza orsamentu ne’ebé aloka ona mai hodi bolu empreza kontraktór sira-ne’ebé maka iha ekipamentu pezadu hodi atende ba dalan Lugatoi,” nia katak.

Jornalista   : Vitorino Lopes da Costa

Editór          : Evaristo Soares Martins

iklan
iklan

Leave a Reply

iklan
error: Content is protected !!