iklan

DILI, POLÍTIKA

Loron internasionál edukasaun: Komisaun G husu Governu fo formasaun ba manorin na’in

Loron internasionál edukasaun: Komisaun G husu Governu fo formasaun ba manorin na’in

Prezidente Komisaun G PN, Antonio Verdial.Imajen/Antonio Goncalves

DILI, 24 janeiru 2023 (TATOLI)—Prezidente Komisaun G trata asuntu Edukasau, Juventude, Kultura no Sidadania iha Parlamentu Nasionál (PN), Deputadu António Verdiál de Sousa, husu nafatin ba Governu liu-liu Ministériu Edukasaun Juventude no desportu (MEJD) fó formasaun ba manorin na’in, infraestrtutura no kria kondisaun ba estudante sira.

Notísia Relevante: Fiskalizasaun Komisaun G nota eskola balun implementa projetu komunitáriu la’o tarde

“Bazea ba rezultadu fiskalizasaun ne’ebé PN hala’o, MEJD presiza tau matan ba problema infraestrutura eskola nian ho seriedade, formasaun ba manorin na’in sira no kria kondisaun ba estudante sira. Ezemplu simples, eskola ensinu sekundáriu jerál ida iha Aileu, estudante ida la’o ho durasaun tempu oras tolu to’o haat sai hosi uma fatin ba eskola ho kondisaun kolen, entaun MEJD tenke kria kondisaun ba estudante refere,” nia hateten ba Agência TATOLI relasiona ho komemorasaun Loron Internasionál ba Edukasaun ne’ebé mundu selebra iha kada loron 24 janeiru, iha Parlamentu Nasionál, tersa ne’e.

Governu presiza kria kondisaun, nune’e estudante sira bele hela besik eskola hodi bele partisipa iha prosesu edukativa iha rai-laran ho di’ak liután.

Maske PN aprova ona orsamentu hodi hadi’a infraestrutura edukativa eskola iha territóriu hamutuk 200-resin, maibé ho situasaun dezastre naturál hanesan anin boot akontese ne’e rezulta estragu lubun, nune’e presiza nafatin atensaun.

Tuir Nia, durante ne’e orsamentu ne’ebé PN aprova aloka ba iha setór edukasaun seidauk sufisiente, nune’e presiza alokasaun orsamentu boot hodi dezenvolve liután área importante ne’e,

“Hakarak ita-nia edukasaun di’ak, tanba edukasaun mak xave ba dezenvolvimentu entaun tenke tau orsamentu boot ba edukasaun iha Timor-Leste,” nia sujere.

Tan ne’e, ho loron internasionál edukasaun ne’ebé liga ba rai Timor-Leste ba iha setór edukasaun, Governu presiza iha seriedade hodi trata efikás no efetivu liután atu nune’e bele hamosu produtividade ida di’ak ba nasaun.

Iha parte seluk, Deputadu bankada Governu ne’e hato’o mós oinsa Governu bele konsidera hodi trata manorin na’in kontratadu, parsiál no idade tama reforma.

Dala barak PN sempre levanta estudante sira iha rai-li’ur hetan difikuldade ho kitas mate ona no pasaporte kaduka, nune’e presiza fó atensaun ho koordenasaun instituisaun relevante servisu integradu atu haree.

Tanba ne’e, nia hato’o mensajen ba Governu iha ámbitu komemorasaun loron internasionál edukasaun ne’e mak tenke hamosu estratéjia ne’ebé di’ak ho vizaun dook bele asegura misaun ba  ezekutivu liuhosi MEJD hodi haree asuntu edukasaun presiza tau matan ho didi’ak.

Notísia Relevante: Komisaun G husu Governu solusiona estudante nia pasaporte ne’ebé kaduka

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!