iklan

NASIONÁL, POLÍTIKA

Reprezentante povu iha PN husu Governu solusiona blanku BI

Reprezentante povu iha PN husu Governu solusiona blanku BI

Billete Identidade. Imajen Tatoli.

DILI, 24 janeiru 2023 (TATOLI)—Reprezentante povu iha uma fukun Parlamentu Nasionál (PN) liuhosi bankada Congresso Nacional Reconstrução, Patrocínio Fernandes, husu Governu liuhosi parte relevante atu solusiona blanku Billete Identidade (BI).

“Blanku atu halo atendimentu ba Billete Identidade (BI) tuir informasaun hosi preokupasaun estudante no populasaun sira barak mak presiza dokumentu ida-ne’e, atu trata sira-nia rekezitu ba eskola nian maibé tuir informasaun blanku ne’e hahú kedas jullu 2022 ne’e laiha oma maibé to’o agora nafatin seiduak iha,” nia levanta liuhosi reuniaun plenária PN, segunda ne’e.

Nia dehan, iha parte seluk impoin hosi idozu no invalidés sira iha territóriu nasionál atu simu subsídiu ne’e ninia rekezitu ida mak tenke iha billete identidade aliened kartaun eleitoral maibé to’o agora tanba blanku BI laiha entaun sira labele halo kartaun refere.

“Maibé iha parte seluk, ita nia estasaun servisu atu fasilita populasaun sira bele hetan dokumentu sira-ne’e laiha. Ita presiza esklaresimentu orsamentu sira aprova iha PN uza ba saida, tanba ho tempu ida naruk hanesan ne’e bele aranja blanku BI,” nia hateten.

Iha reuniaun plenária ne’e, Deputadu Fretilin, Alexandrinho Cardoso, levanta asuntu seluk kona-ba funsionáriu Autoridade Aduaneira (Alfandega) limitadu ne’ebé mak kontrola sasán tama hosi fronteira terrestree bainhira atende karreta boot tama mai Timor-Leste.

“Bainhira karreta fuzu boot rua ka tolu tama mai, funsionáriu númeru menus liu halo kontrolu ba sasán sira ladún másimu entaun check list de’it. Barak mak sira labele atu kontrola, entaun tama de’it. Sasán selu taxa menus maibé mai to’o rai-laran faan ho folin karun tebes,” nia hateten.

Tanba ne’e, presiza rekruta tan funsionáriu Alfandega hodi bele kontrola sasán tama-sai hosi fronteira terrestre ho di’ak.

Deputadu Fretilin, António dos Santos, husu ba Institutu Jestaun Ekipamentu (IGE) atu normaliza estrada hosi kruzamentu Hatulia ba de’it ponte Vila Baria kuaze han durasaun oras rua ho balun.

Tanba, nia dehan, loro-loron populasaun sira tenke mai hola sasán iha Gleno-Ermera maibé populasaun sira tenke dada karreta Cary tanba dalan aat ne’ebé fó impaktu boot ba inflasaun iha merkadu.

Deputadu Fretilin, Dario Madeira, kontinua levanta preokupasaun mezmu hato’o ona pedidu ba parte relevante maibé to’o agora seidauk iha resposta ruma relasiona ho komunidade hela iha suku tolu hosi postu administrativu Uatucarabau-Viqueque relasiona tempu udan, komunidade sira hela iha suku Bahatata, Afaloicai, Loihunu atu asesu mai postu susar tebes entaun presiza normaliza estrada.

Deputada PLP, Domingas dos Santos, hateten presiza manutensaun  ba irrigasaun Maliana II ne’ebé di’ak hodi agrikultór sira halo natar iha époka ida ka rua hodi kanaliza bee no husu Governu atu atu hadi’a tratór sira-ne’ebé aat.

Hatán ba ida ne’e, Ministru ba Asuntu Parlamentár no Komunikasaun Sosiál (MAPKOMS), Francisco Jerónimo, rejista hela preokupasaun hirak ne’e no nia parte sei hato’o ba ministru tutela.

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!