iklan

NASIONÁL, HEADLINE, SEGURANSA

Taur: Autoridade seguransa sei lahusik autór krime sira livre

Taur: Autoridade seguransa sei lahusik autór krime sira livre

Primeiru-Ministru, Taur Matan Ruak. Imajen Tatoli/Egas Cristovão

DILI, 24 janeiru 2023 (TATOLI) – Primeiru-Ministru (PM), Taur Matan Ruak, hatene autoridade seguransa sei lahusik autór krime sira livre no tenki responsabiliza ba ninia aktu ne’ebé hamosu instabilidade iha rai-laran.

“Iha instituisaun Estadu ne’ebé vokasionadu hodi interven iha konflitu sira hodi lori suspeitu ka autór sira responsabiliza ba sira-nian aktu. Hanesan kazu iha Ponte BJ Habibie autor kapturadu, ne’ebé hothotu toma inisiativa komete krime, nia responsabiliza ba nia aktu sira. Razaun saida de’it sei lahusik autór krime sira ne’e tanba estabilidade ne’e importante”, Xefe Governu hateten hafoin enkontru ho Prezidente Repúblika, José Ramos Horta, iha Palásiu Prezidensiál Bairru Pité.

Xefe Ezekutivu subliña ema hotu lakohi konflitu sira ne’e akontese, tanba ida ne’e lalori benefísiu ba ema ida, nein sira ne’ebé halo no sira ne’ebé sofre konsikuénsia.

“Maibé lakon tempu no lakon sasán, entaun ha’u-nian apelu mak evita konflitu sira ne’e. Sei lapermite hamosu inseguransa iha ita-nian rain satán iha tinan ne’e festa demokrásia rua tuituir malu, hanesan Eleisaun Parlamentár no eleisaun suku sira”, nia afirma.

Tenente-Jenerál Reformadu, Lere Anan Timur. Imajen Tatoli/Egas Cristovão

Sorin seluk, Tenente-Jenerál Reformadu, Lere Anan Timur, husu Governu atu buka solusaun no kauza hosi konfrontu sira ne’ebé akontese iha kapitál.

“Maski ita hasoru difikuldade barak hanesan problema dezempregu, arte marsiál no ritual, maibé iha nasaun ida iha órgaun soberanu hodi rezolve situasaun rai-laran. Ita labele husik krime domina fali ita, más halo oinsá mak halakon, tanba arte marsiál no rituál ne’e mesak timoroan”, nia akresenta.

Jenerál reformadu ne’e hateten, problema arte marsiál la’ós foin akontese, maibé dezde Timor-Leste ukun-aan.

“Ha’u rekomenda tenki reforma lei ou medida administrativa, no tribunál tenki duru. Ha’u rona dehan Ministériu Justisa atu muda prizaun Becora ba Betano. Hanoin ida ne’e di’ak liután, husik sira serbisu, ita labele halimar ho kriminozu”, nia dehan.

Eis-Xefe-Estadu-Maiór Jenerál ne’e husu mós ba Komisaun Reguladora Arte Marsiál (KRAM) atu husu responsabilidade ba organizasaun idaidak, tanba maioria grupu sira baku malu no autoridade seguransa kaer ninia boot sira rasik lakoñese.

“Boot sira hosi arte marsiál tenki koñese ninia membru, nune’e fasíl kontrola. Hanesan ha’u jenerál, ha’u-nian soldadu halo sala ruma, ema dehan soldadu ida ne’e ka ida ne’ebá ha’u koñese no bolu hodi fó kastigu. Sala boot liu bá to’o tribunal no ikus tenke tama komarka hodi kumpre”, nia fó hanoin.

Notísia relevante: Kazu omesídiu Elemloi, Komisaun B preokupa servisu sekretu

Jornalista: Antónia Gusmão

Editora: Maria Auxiliadora

iklan
iklan

3 Comments

Leave a Reply

iklan
error: Content is protected !!