iklan

EDUKASAUN, HEADLINE, SOSIEDADE SIVĺL

TLCE konsidera investimentu rekursu umanu iha setór edukasaun TL sei menus

TLCE konsidera investimentu rekursu umanu iha setór edukasaun TL sei menus

Koordenadór nasionál TLCE, José Monteiro. Imajen Tatoli/Tomé Amado

DILI, 24 janeiru 2023 (TATOLI)—Timor-Leste Coalition For Education (TLCE, sigla inlgés), konsidera durante iha sira-nia akompañamentu nota investimentu rekursu umanu iha área setór edukasaun iha Timor-Leste (TL) sei menus.

Koordenadór TLCE, José Monteiro, hateten, hafoin TL restaura ninia indepedénsia ko’alia kona-ba área edukasaun menus buat barak no liga ba profesór sira konta iha de’it 15% profesór, tanba rekursu umanu barak maihosi Indonézia ho nune’e TL ukun-an sira mós filafali ba sira-nia rai.

“Investimentu iha área edukasaun sei menús iha TL, kompara ho investimentu iha área sira seluk hanesan infraestrutura no seluk tan. Liga ba tema loron internasionál  edukasaun 2023 hateten, ‘investe iha ema, fó prioridade ba edukasaun’ maibé realidade ita-nia rai ida ne’e seidauk hatudu. Tanba kada tinan alokasaun orsamentu ba edukasaun ne’e kiik kompara ho ministériu sira seluk,” José Monteiro dehan ba Agência Tatoli, iha nia-fatin Caicoli, Dili, tersa ne’e.

Nia dehan, TL hetan osan hosi fundu petrolíferu maibé dala-barak lori osan mina nian ne’e ba ke’e filafali mina, ida ne’e tuir investimentu ladun loos. Tanba tuir lei fundu petrolíferu ne’e, hasai osan hosi fundu petrolíferu, atu dezenvolve iha área sira seluk, liuliu área edukasaun nune’e prepara rekuru umanu ne’ebé adekuadu  atu bele kontribui ba  área sira seluk ne’ebé mak iha.

Notisia relevante : TLCE konsidera programa ‘eskola ba uma’ la efetivu

“Bainhira osan investimentu iha área edukasaun ne’e kiik ba área infraestrutura mak boot ida ne’e ita garante ona katak ema ne’ebé servisu iha infraestrutura ne’e la’os ema ne’ebé ita prepara iha ita-nia rai rasik maibé hosi ema seluk. Signifika ita la halo planu tuir ita-nia kbiit, no tuir ita-nia rekursu ne’ebé mak disponivél,” nia dehan.

Ne’ebé investimentu rekursu umanu iha área edukasaun presiza orsamentu ne’ebé balansu entre ministériu sira seluk, tanba setór edukasaun hetan sofrementu boot labele ba oin tanba Ministériu Edukasaun Juventude no Desportu (MEJD) halo de’it mak rutinidade entaun investimentu sei menús.

Koordenadór TLCE ne’e dehan, ho loron mundiál edukasaun tinan 2023 ne’e hakarak atu fanu Governu tau atensaun ba asesu ba kualidade edukasaun iha TL. Maibé tenke haree mós rekursu umanu iha TL ne’ebe importante tebes atu dezenvolve no  labele depende ba rekursu umanu rai-seluk nian.

“Bainhira ita aloka orsamentu boot ba setór edukasaun nian, ita investe rekursu umanu agora, nia benefísiu tinan 20 ka 30 mai ita la menus ona rekursu umanu atu dezenvolve iha setór edukasaun inklui mós setór sira seluk. Tanba ne’e,  Estadu mós tenke adopta katak investimentu prosesu dezenvolvimentu ne’e nia prioridade mak ema maibé ida ne’e komitmentu verbal laiha prátika,” nia hateten.

Nia dehan, Governu atu prátika ne’e haree hosi alokasaun orsamentu kada tinan. Saida mak sira gasta no kapitál sosiál ne’e importante liu no dezenvolvimentu ne’e nia sentru mak ema maibé kada tinan nafatin tau osan oituan liu iha setór edukasaun.

Notisia relevante : TLCE Sei Halo Peskiza ba Formasaun Profesór

“Entaun investimentu ne’e importante tebes atu eleva fali kualidade edukasaun. No bainhira edukasaun kualidade ona bele prepara rekursu ne’ebé kualidade iha área hotuhotu liuliu iha área sira ne’ebé mak ita-nia rekursu umanu sei menus no área sira ne’ebé mak ita presija,”  José dehan.

Nia dehan, kualidade edukasaun iha TL tuir TLCE nia haree sei fraku tanba MEJD preokupa liu ba atividade komplementár sira no la haree ba kualidade edukasaun nian.

Hosi dezafiu sira ne’e, Governu nia esforsu hodi dezenvolve no hasa’e kualidade edukasaun iha TL mak, MEJD tenke konvense iha nivél polítiku no tékniku. Katak Ministériu Edukasaun tenke bele konvense nia maluk seluk áfavor ba nia planu bele tau importánsia maibé MEJD la konsege iha kapasidade atu bele prepara planu ne’ebé ema seluk gosta.

Maibé atu halo ida ne’e, MEJD mós tenke iha ekipa ida ne’ebé mak kompetente iha planeamentu ne’ebé mak di’ak no monitorizasaun ne’ebé mak forte hodi grante programa hotu ne’ebé mak aprova no tenke implementa ho di’ak.

Notisia relevante : TLCE husu Governu elabora kurrikulum nível sekundáriu iha ensinu rekorrente

“Estadu tenke aloka orsamentu ne’ebé naton ba Edukasaun maibé edukasaun mós tenke aprezenta lai programa di’ak, razoavel no ligasaun direita ba kualidade edukasaun. Tanba daudaun ne’e programa ne’ebé la’o barak hanesan programa Eskola Iha Uma. Program  ne’e nia benefísiu ita lahatene. Hira mak eskola iha uma no hira mak ba eskola iha eskola fatin sira,” nia akresenta.

Jornalista : Arminda Fonseca

Editora     : Armandina Moniz

iklan
iklan

One Comment

  1. Faculdade Educação ne’e taka tiha mos diak tamba governo rasik la fo prioridade! Mesak promeça falço deit.

Leave a Reply

iklan
error: Content is protected !!