CNE propoin PN tau prioridade ba EhD iha eleisaun parlamentár

DILI, 25 janeiru 2023 (TATOLI)–Prezidente Komisaun Nasionál Eleisaun (CNE), José Agostinho da Costa Belo, hateten iha alterasaun lei eleitorál ne’e PN tenke tau prioridade ba asuntu Ema ho Defisiénsia (EhD) ne’ebé sei tuir eleisaun parlamentár 2023.
Notísia Relevante: CNE propoin PN tau prioridade ba EhD iha eleisaun parlamentár
“Liga ho aleterasaun lei eleitorál ami propoin ba Parlamentu Nasionál liu-liu Komisaun A iha PN atu tau prioridade ba asuntu ema ho defisiénsia sira, atu nune’e bele asegura prosesu eleisaun parlemantar iha tinan ne’e no sira mós bele fó sira-nia votu ho rasionál,” Prezidente Komisaun Eleisaun (CNE) ne’e hateten ba Agência Tatoli liuhosi telefónika, kuarta ne’e.
Tanba, tuir nia, ema ho kondisaun defisiénsia liu-liu ema defisiénsia matan mós iha direitu ba kandidatura ne’ebé nia hili no eskolla, nune’e presiza tau mós importánsia ba asuntu ne’e.
Tanba iha esperiénsia tinan kotuk iha eleisaun prezidensiál nian ne’e, ema ho defisiénsia sira hetan tulun hosi ema seluk mak ezerse sira-nia direitu votu, entaun ho alterasaun lei ne’e presiza prevee nune’e bele asegura prosesu eleisaun parlamentár ne’e.
“Ha’u hanoin haree hosi kestaun tékniku ne’e laiha problema maibé presiza mak prevee iha altersaun lei eleitorál, nune’e bele iha dalan hodi bele implementa,” nia dehan.
Tanba, nia dehan, CNE hahú ona esplika ona ba asosiasaun defisiénsia sira kona-ba mudansa sira ne’ebé mak la’o ona bainhira halo enkontru ho sira.
Nia dehan, CNE mós hahú halo ona formasaun ba funsionáriu CNR mezmu lei seidauk ba debate iha espesialidade, maibé ida-ne’e kabe ba Parlamentu Nasionál nian no sspera katak ida-ne’e bele halais nune’e bele implementa ona.
Jornalista : Osória Marques
Editór : Cancio Ximenes

