iklan

NASIONÁL, EKONOMIA, HEADLINE

Governu estende distribuisaun sesta bázika to’o 30 maiu

Governu estende distribuisaun sesta bázika to’o 30 maiu

Cesta Básica.

DILI, 25 janeiru 2023 (TATOLI) – Governu deside hodi halo estensaun ba distribuisaun sesta bázika ba família timoroan sira ne’ebé presiza to’o iha 30 maiu 2023.

“Ho aprovasaun ba diploma ida-ne’e, prazu distribuisaun sesta bázika, ne’ebé molok ne’e define ona to’o loron 31 fulan-dezembru tinan 2022, sei hanaruk tan to’o loron 30 fulan-maiu tinan 2023”, Ministru Prezidénsia Konsellu Ministru, Fidélis Magalhães, dehan iha Palásiu Governu.

Proposta alterasaun ba prolongamentu distribuisaun sesta bázika ne’e aprezenta husi Ministru Koordenadór Asuntu Ekonómiku, Joaquim Amaral, ne’ebé estabelese ona husi Dekretu-Lei númeru 10/2022 ne’ebé aprova medida sira atu haforsa distribuisaun sesta bázika ba família timoroan sira ne’ebé presiza no apoiu ba operadór ekonómiku lokál sira no kria rejime espesiál ida aprovizionamentu, iha ámbitu planu rekuperasaun ekonómika nian.

“Alterasaun ne’e atu fasilita implementasaun sesta bázika ba hirak ne’ebé seidauk hetan hodi bele hetan konforme buat ne’ebé Governu planea tiha ona. Ho estensaun ne’e bele fó tempu hodi rezolve asuntu pendente sira”, nia adianta.

Distribuisaun sesta bázika ne’ebé la’o daudaun iha territóriu no laran no atinje ona 90% ne’e responsabilidade Ministériu Turizmu, Komérsiu no Indústria no  parte Sekretaria Estadu Kooperativa (SEKoop) atinje 70%.

Jornalista: Antónia Gusmão

Editora: Maria Auxiliadora  

iklan
iklan

Leave a Reply

iklan
error: Content is protected !!