DILI, 25 janeiru 2023 (TATOLI)—Tuir fiskalizasaun komisaun D trata asuntu Ekonomia no Dezenvolvimentu iha Parlamentu Nasionál (PN), segunda-sábadu (21-24 dezembru 2022), nota katak irrigasaun Maliana II presiza normaliza, nune’e mota labele sobu estraga intek no kanál irrigasaun.
“Observa nota katak kondisaun atuál irrigasaun Maliana II, hahú hosi intek primeira to’o intek sekundária indentifika fatin tolu mak kondisaun grave tebes tanba impaktu hosi bee-mota ke’e no sobu. Fatin tolu ne’e mak hanesan Mabilgol, Ailete no Walgol, tan ne’e komisaun D husu atu atende ho emerjénsia liuhosi mobiliza makina pezadu hodi halo normalizasaun,” refere relatóriu komisaun D ne’ebé Agência Tatoli asesu, kuarta ne’e.
Atu normaliza irrigasaun refere, nune’e mota labele sobu estraga intek no kanál irrigasaun ne’ebé existe no mós husu atu loke bee-dalan foun hodi bee bele suli ba natar, atu nune’e agrikultór sira kontinua halo natar.
Se la atende ho emerjénsia mak impaktu boot ba área natar hamutuk ektare 2800 sei labele kuda hare iha tinan 2023.
Situasaun ne’e parte dirasaun agrikultura munisípiu hato’o ba iha nasionál no dirasaun nasionál irrigasaun mós tun direta ba haree no kompromete ona katak ministériu iha mákina pezadu no sei buka rezolve de’it mina hodi bele tun mai halo atendimentu, hodi bee bele halai ba natar sira maibé to momentu ida-ne’e seidauk resposta.
Vizita irrigasaun Mautalo-Cailaco
Deputadu komisaun D mós hala’o vizita ne’e, tuir informasaun ne’ebé relata hosi ofisiál irrigasaun munisípiu Bobanaro katak problema irrigasaun Mautalo kada tinan mota sobu estraga hela de’it, totál natar iha ektáre 500 maibé kada tinan menus ba bebeik tanba impaktu hosi mota sobu no kuaze natar ektáre 100 mak sai ona hanesan bee-mota nia dalan.
Nune’e mós irrigasaun Marco presiza halo reabilitasaun ba kanal irrigasaun no mós konstrusaun intek foun, tanba intek antigu mota sobu estraga.
Iha irrigasaun Mautalo no irrigasaun Marco atu atende emerjénsia mak halo konstrusaun bareira hodi salva poténsia natar ne’ebé iha, tanba kada tinan poténsia natar menus ba bebeik impaktu hosi mota.
Kestaun ne’e presiza serbisu hamutuk integradu entre Ministériu Agrikultura no Peska (MAP) no Ministériu Obra Públika (MOP) hodi halo normalizasaun no oinsá planu ba oin atu halo kontrusaun ba barreira.
Jornalista : Nelson de Sousa
Editór : Cancio Ximenes
