Komunidade Afaloikai na’in-5.580 hahú simu Cesta Bázika
VIQUEQUE, 25 janeiru 2023 (TATOLI)— Xefe Suku Afaloikai, postu Uatulari, munisípiu Viqueque, Costantinho Guterres, informa komunidade suku Afaloikai, kuarta ne’e, hahú simu programa Cesta Bázika.
“Ohin, empreza distribuitór hahú fahe sesta bázika ba benifísiáriu sira hamutuk 5.580, kompostu hosi aldeia 10”, hateten Costantinho Guterres ba jornalista sira, iha sede suku Afaloikai, kuarta ne’e.
Autoridade lokál ne’e observa empreza distributór sira fahe produtu lokál 75% no produtu importadu 25%, kompostu hosi foos, na’an karau ne’ebé empreza sosa husi komunidade postu Uatulari.
“Iha distribuisaun ne’e, kada ema simu produtu tipu 10. Nune’e empreza sei halo distribuisaun durante semana ida iha ami-nia suku”, katak.
Iha fatin hanesan, Diretór Empreza Distribuitór Lazenda Naroman unip LDA, José Gomes Pinto, haktuir pakote sesta bázika na’in-10, hanesan foos ne’e sosa hosi komunidade Uatulari ho tonelada 38, talas, mina nú, masin-midar, kafé, rinso, hudi no ikan.
“Tuir lista benifísiáriu na’in-5.444, maibé dadus husi suku benifísiáriu liu, nune’e ami sei koordena ho autoridade atu resolve kestaun ne’e”, nia afirma.
Entretantu, Benifísiáriu suku Afaloikai, Salvadór Fereira Ximenes, agradese ba Governu, maibé rekomenda atu hadi’a produtu sesta bázika.
“Produtu hirak ne’e, ami prontu simu, maibé ami sujere ba futuru hadi’a produtu sira ne’ebé iha nutrisaun. Ami mós kontinua implementa programa sesta bázika tanba benefisia duni populasaun,” nia sujere.
Jornalista: Vitorino Lopes da Costa
Editór : Florencio Miranda Ximenes
