iklan

HEADLINE, SAÚDE

Laboratóriu Nasionál Saúde preparadu responde ba moras infesaun

Laboratóriu Nasionál Saúde preparadu responde ba moras infesaun

Fasilidade-sira iha Laboratóriu Nasionál Saúde. Imajen Tatoli/Nélia Fernandes.

DILI, 25 janeiru 2023 ( TATOLI) – Laboratóriu Nasionál Saúde iha Timor Leste preparadu atu responde ba moras infesiozu.

Mikrobiolojista no autór prinsipál Menzies Timor-Leste, Nevio Sarmento, hateten expansaun rápida husi Timor-Leste nia abilidade laboratóriu nian durante pandémia Covid-19 ne’e prepara di’ak liután, iha nasaun ne’e, atu responde ba moras infesiozu iha futuru.

”Kolaborasaun ida entre Ministériu Saúde Timor-Leste no Menzies School of Health Research (apoiu husi Governu Australia) ne’ebé signifika katak nasaun ne’e agora iha ona rekursu laboratóriu barak no forsa traballu ne’ebé treinadu’’, Nevio dehan liuhosi komunikadu imprensa ne’ebé TATOLI asesu, ohin.

Melloramentu hirak ne’e bele ajuda Timor-Leste atu responde ba moras infesiozu prevalente sira seluk hanesan malária, tuberkuloze no HIV.

Artigu foun ida ne’ebé publika iha The Lancet Regional Health-South East Asia, hatudu oinsá parseiru internasionál sira apoiu Timor-Leste atu hasa’e ninia abilidade teste diagnóstiku nian durante pandémia. Ida ne’e haree katak teste Covid-19 hamutuk 200,000-resin mak kompleta ona no 22,500-resin mak hetan kazu pozitivu deteta ho loloos iha fevereiru 2022.

Mikrobiolojista no autór prinsipál Menzies Timor-Leste nian, Nevio Sarmento, informa katak haluan kapasidade husi Laboratóriu Nasional Saúde-Laboratóriu Diagnóstiku Molekular (NHL-MDL) hodi halo teste ba Covid-19 nu’udar komponente importante ida ba resposta pandémia Timor-Leste nian.

“Menzies servisu hamutuk ho NHL-MDL hodi fornese ekipamentu no rekursu ba teste diagnóstiku, habelar kapasidade laboratóriu nian no mós kapasitasaun ba sientista sira ho rápidu hodi hala’o teste”, esplika nia.

Pasu hirak ne’e importante tebes atu hadi’a teste iha Dili no atu implementa sentru teste satelite iha Timor-Leste laran tomak.

“Iha piku pandémia nian, Menzies apoiu ona NHL-MDL hodi halo teste hamutuk 2,000 kada loron. Teste eskala boot ne’e fornese dadus populasaun krusiál ne’ebé ajuda medidas saúde públika nian”, hateten nia.

Ne’e husik hela legadu duradu ba nasaun, ne’ebé agora iha kapasidade atu uza vijilánsia laboratóriu hodi rezolve moras infesiozu sira seluk.

Co-Líder ba Projetu Menzies Timor-Leste nian, Asosiadu Joshua Francis, hateten maske pandémia ne’e iha inísiu sai hanesan ameasa boot ba progresu Timor-Leste nian, apoiu lokál no internasionál sira asegura katak ida ne’e mós hanesan oportunidade ida atu hadi’a teste no kuidadu saúde nian.

“Pandemia ne’e fó opportunidade mai ami atu aprende hamutuk kona-ba oinsá atu hatán ba moras infesiozu sira nia surtu iha Timor-Leste, iha ne’ebé uza vijilánsia laboratóriu hodi informa kona-ba kuidadu klínika no mós polítika saúde públika nian,” afirma Francis.

Husi programa investimentu pre-pandémiku ne’ebé la’o hela mak hametin sistema laboratóriu sira ne’e, fornese fundasaun ida ne’ebé metin hodi habelar lalais kapasidade teste ba COVID-19 nian.

Entertantu, Menzies kontinua servisu hamutuk ho Governu Timor-Leste no Ministériu Saúde hodi hametin sistema saúde sira hodi responde ba moras infesiozu sira iha Timor-Leste, iha parseria ho Governu Australia, Fleming Fund ne’ebé fasilita husi Mott MacDonald Group no Organizasaun Mundiál Saúde.

Jornalista : Felicidade Ximenes

Editór : Zezito Silva

iklan
iklan

Leave a Reply

iklan
error: Content is protected !!