DILI, 25 janeiru 2023 (TATOLI)—Prezidente Repúblika (PR), José Ramos Horta, kuarta ne’e, halo enkontru ho estrutura partidu tolu kompostu hosi União Democrático Timorense (UDT), Frente Mundança (FM) ho Partidu Unidade Dezenvolvimentu Demokrátiku (PUDD), hodi halo konsulta molok dekreta loron eleisaun Parlamentár 2023.
Notísia Relevante: PR sei dekreta kalendáriu eleisaun hafoin rona partidu polítiku sira
“Ami UDT mai, partidu tolu ne’ebé uluk la’o hamutuk mai atu responde ba konvite Prezidente nian hodi haree ba data eleisaun Parlamentár ne’ebé atu mai. Ho ida-ne’e Prezidente adianta ba UDT, PUDD ho Frente Mudanaa previzaun ba eleisaun ne’e iha 06 ho 12 maiu. Depois Prezidente sei fó sai iha tempu badak no hafoin halo konsultasaun ho partidu polítiku hotu-hotu mak Prezidente sei foti desizaun ne’ebé atu konfirma loloos data eleisaun,” Prezidente Partidu UDT, Francisco Carlos, hateten ba jornalista sira hafoin ramata enkontru iha Palásiu Prezidensiál Nicolau Lobato, Bairru Pite.
Tuir konstituisaun artigu 86 alínea c, nia hateten, kompeténsia tomak ba Prezidente Repúblika (PR) atu dekreta loron eleisaun Parlamentár.
“UDT submete de’it desizaun Prezidente, fiar tomak iha Prezidente nia desizaun,” nia dehan.
Partidu UDT prepradu tanba durante ne’e iha baze komesa la’o hodi halo konsolidasaun no hein eleisaun parlamentár mai ne’e, UDT prontu atu kompete.
Reprezentante hosi partidu Frente Mudana, Ricardo Nheu, hateten markasaun loron eleisaun kompeténsia Xefe Estadu nian no Frente Mundança prontu partisipa saida mak PR deside.
“Frente Mudança prontu tanba iha tempu saida de’it ami prontu iha eleisaun ne’e,” nia hateten.
Prezidente PUDD, Silvestre Sufa, hateten tuir konstituisaun direitu prerogativu Xefe Estadu atu marka loron eleisaun Parlamentár no PUDD hanesan partidu polítiku atu bainhira de’it PR dekreta loron eleisaun, PUDD prontu hasoru.
Preprasaun PUDD nian hala’o antes ona, hanesan partidu polítiku nia iha serbisu importante rua mak serbisu diáriu no polítiku nian tinan barak ona to’o mai hein markasaun loron eleisaun PDUU prontu.
Nia mós informa, PUDD hala’o ona nia kongresu nasionál iha 19 novembru 2022.
Jornalista : Nelson de Sousa
Editór : Cancio Ximenes
