DILI, 25 janeiru 2023 (TATOLI)— Diretór Ezekutivu Servisu Apoiu Sosiedade Sivíl no Auditoria Sosiál, iha Gabinete Primeiru Ministru (SASCAS-PM,sigla portugés) Edvin Soares Noronha, hateten, progresu konstrusaun fíziku ba igreja Aimutin atinje ona 83,5%.
Nia dehan, konstrusaun igreja Aimutin ne’e rasik antes ne’e hetan apoiu hosi SASCAS. Apoiu fundu ikus ne’ebé SASCAS fó ne’e iha tinan 2021 ho montante $4.000, hodi kompleta orsamentu ne’ebé Governu disponivél fo ba igreja ho milliaun $3.
“Obra refere daudaun nia atinjimentu bazeia ba orsamentu milliaun $3 ne’e atinje ona 100%. Tuir dadus ne’ebé parókia no kompañia oferese ba mai ami. Maibé nia atinjimentu progresu fíziku konstrusaun foin atinje 83,;5%,” Edvin Soares Noronha dehan ba Agência Tatoli, iha nia knaar-fatin, Dili, kuarta ne’e.
Nia dehan, orsamentu ne’ebé SASCAS apoiu ikus iha 2021 ne’e sa’e mai Governu liuhosi SASCAS labele apoiu tan tanba durante ne’e laiha orsamentu espesífiku ba ida ne’e no Governu Timor-Leste ho Santa Sé liuhosi Konferénsia Episkopál Timorense (CET, sigla portugés), asina ona akordu katak osan ne’ebé Governu apoiu ba igreja sei jere hosi CET.
“Ita ko’alia kona-ba projetu konstrusaun igreja Aimutin ne’e na’in mak igreja Katólika tanba iha akordu ida entre Governu Timor-Leste ho Santa Sé liuhosi CET, hateten momós katak orsamentu ne’ebé Governu apoiu ba igreja ne’e sei jere hosi CET, entaun ba oin ita laiha tan apoiu orsamentu ruma ba projetu ne’e tanba sei kabe ba CET,” nia hateten.
Nia dehan, SASCAS rasik, laiha aprovizionamentu direita ba projetu sira ne’e, tanba sira-nia knaar ida mak jere orsamentu Governu nian fó apoiu orsamentu ba sosiedade sivíl inklui mós subvensaun ba relijiozu sira.
“Tanba ne’e mak ami fó apoiu ba igreja maibé la halo aprovizionamentu ba projetu sira, tanba subvensaun públika ami jere liuhosi servisu halo parseiru ho parókia sira entaun parókia mak halo nia aprovizionamentu, maibé ba igreja sira SASCAS laiha osan atu tau matan ba sasán sira ne’e tanba na’in mak igreja Katólika liuhosi CET,” nia hateten.
Jornalista : Arminda Fonseca
Editora : Armandina Moniz
