iklan

EKONOMIA, HEADLINE, INKLUZAUN SOSIÁL, MUNISÍPIU, SOSIEDADE SIVĺL, VIQUEQUE

Uma-kain 75 iha suku Matahoi seidauk asesu liña elétrika

Uma-kain 75 iha suku Matahoi seidauk asesu liña elétrika

Xefe suku Matahoi, António Amaral. Imajen Tatoli/Vitorino Lopes da Costa.

VIQUEQUE, 25 janeiru 2023 (TATOLI)- Xefe suku Matahoi, postu adiministrativu Uatulari, munisípiu Viqueque, Antonio Amaral, relata, komunidade suku Matahoi ne’ebé hela iha área Lebadae uma-kain 75 maka seidauk asesu liña elétrika.

“Ha’u-nia populasaun iha Lebada’e kuaze tinan barak ona, komunidade sira seidauk asesu ba ahi eletrisidade (liña elétrika). Nune’e komunidade sira sente katak seidauk goja ukun-aan tanba sira seidauk asesu ba naroman,” Autoridade suku Matahoi, ba Agência Tatoli, iha suku Matahoi, kuarta ne’e.

Autoridade ne’e hatutan, iha tinan 2010 suku Matahoi hato’o pedidu husu dada ahi eletrisidade ba komunidade Lebada’e, maibé to’o agora seidauk iha resposta.

“Kuaze proposta barak maka ha’u hatama ona ba Governu no empreza balun tuir konkursu públiku, maibé la manán iha prosesu konkursu. Hosi suku Afaloikai dada ba Lebadae purvolta metru 1000 (kilómetru ida), maibé la hetene loos bainhira maka Governu bele tau ba prioridade,” nia subliña.

Nia dehan, komunidade área remota presiza asesu ba ahi eletrisidade tanba ne’e ministériu kompetente no Eletrisidade Timor Leste, Empreza Públiku (EDTL.E,P) tau matan ba komunidade área rurál asesu ba eletrisidade. Enkuantu aldeia Lebada’e totál 75 no totál abitante hamutuk 205.

Antes ne’e deputada bankada Khunto, Olinda Guterres, husu Governu responde preokupasaun komunidade aldeia Levada’e nian kona-ba eletrisidade.

“Eletrisidade ba Lebadae uluk kedas ha’u hato’o iha plenária, maibé Governu seidauk foti medida. Nune’e ha’u sei kontinua ba hato’o iha plenaria tanba ita-nia komunidade sira kontinua sunu lilin iha tempu kalan hodi estudante sira uza ba estuda. Ha’u hanoin

Governu presiza tau ba konsiderasaun atu ita-nia komunidade sira bele asesu ba naroman,” nia tenik.

Jornalista   : Vitorino Lopes da Costa
Editór          : Florencio Miranda Ximenes

iklan
iklan

Leave a Reply

iklan
error: Content is protected !!