VIQUEQUE, 26 janeiru 2023 (TATOLI)- Tuir estatístika iha tinan 2022, Uma mahon Fundasaun Knu’a Haberan Komunidade (FKHC), iha postu Viqueque-vila, munisípiu Viqueque rejista vítima violénsia doméstika na’in-71.
“Iha tinan 2022, ami rejista vítima na’in-127, hosi ne’e maioria vítima violénsia doméstika mak na’in-71. Vítima mai husi postu lima iha munisípiu Viqueque”, Konsileira Uma Mahon FKHC, Pascoela Fereira, hateten ba jornalista sira iha nia-knaar fatin, kinta ne’e.
Vítima 127 ne’e kompostu hosi vítima violénsia doméstika na’in-71, violénsia sexuál na’in-27, abandona 22, omísidu ida, insestu rua, violénsia ekonómia ida, violénsia fíziku rua no violénsia pisokolojia na’in-ida.
Hosi totál vítima ne’e, nia dehan hela de’it vítima na’in-ida, maka daudaun ne’e sei iha uma mahon. Ba vítima sira seluk entrega ona ba família sira no vítima balun transfere ba uma mahon seluk.
“Durante tinan 2022, ami aprezenta kazu hosi vítima violénsia doméstika no violénsia sexsuál na’in-38 ba Ministériu Públiku hodi prosesa autór sira tuir lei”, nia afirma.
Nia dehan: “Bainhira vitima sira tama iha uma mahon ami fó konsellu ba vitima sira atu sira rekupera presaun sira-ne’ebé sira hasoru, molok sira fila ba sira-nia família sira”, katak.
Daudaun ne’e, funsionáriu iha uma mahon Viqueque na’in-ualu ne’ebé fó hela atendimentu ba vítima sira.
Jornalista : Vitorino Lopes da Costa
Editór : Florencio Miranda Ximenes
