Autoridade Covalima rekomenda konferensista hili prezidente CCI iha vizaun-misaun
COVALIMA, 26 janeiru 2023 (TATOLI)–Reprezentante Administradór Munisípiu Covalima, Afonso Nugueira Nahak, rekomenda ba konferensista sita atu hili prezidente Kámara Komérsiu Indústria (CCI-sigla portugés) iha vizaun no misaun, estabelese edifísiu permanente no rekruta asesór jurídiku ba CCI iha Covalima.
“Ami rekomenda ba ita-boot sira dahuluk tenke hili prezidente CCI Covalima ho ema-ne’ebé iha vizaun no misaun atu servisu hodi hakuak ema-hotu iha Covalima, konstrui edifísiu permanente no mós iha asesór jurídiku,” Afonso Nugueira Nahak hateten liuhosi nia diskursu bainhira partisipa konferénsia CCI Covalima ba dala-IV, iha salaun AMC Sukaer Laran, kinta ne’e.
Razaun atu CCI Covalima tenke iha edifísiu permanente ida tanba durante ne’e bainhira ema ruma lori karta ba dirijente CCI ne’e defisil tebes atu hetan, no tenke iha asesór jurídiku ida nune’e bele analiza lei sira-ne’e.
“Ami lori karta ruma ba mós difísil entaun tenke harii edifísiu permanente iha Covalima atu ema hotu bele hatene estrutura CCI no tenke iha mós asesór jurídiku hodi halo analiza ba lei sira-ne’e,” nia rekomenda.
CCI Covalima presiza asesór jurídiku atu halo analiza ba lei tanba balun sei iha problema ho razaun balun iha autorizasaun no balun laiha autorizasaun.
“Ita-nia lei sira-ne’e iha problema hanesan balun autoriza no balun la autoriza ho nune’e kauza bo“ot iha postu integradu implementadór sira la foti desizaun ho nune’e mak prezensa asesór jurídiku iha CCI Covalima importante,” nia hateten.
Objetivu iha asesór jurídiku atu haree lei sira hodi hato’o paresér ba administradór munisípiu Covalima hodi bele foti desizaun.
Prezidente CCI-TL, Jorge Manuel de Araújo Serano, hateten nia parte konsidera rekomendasaun hosi autoridade lokál atu iha asesór jurídiku no mós konstrui edifísiu permanente iha Covalima.
“Munisípiu ida-ida mak sei harii maibé gabinete jurídiku ne’e, ha’u-nia programa hafoin ha’u eleitu sai prezidente CCI-TL, hakarak iha gabinete jurídiku ida nune’e fó apoiu ba emprezáriu hotu,” nia esplika.
Razaun iha asesór jurídiku hodi haree lei sira no atu ko’alia ho Governu hodi hadi’a lei sira-ne’ebé ligadu ho atividade ekonómiku ho atividade emprezáriu sira-nian hodi bele fó apoiu ba maluk emprezáriu atu fó advokasia ba emprezáriu sira.
Bazea ba dadus iha tinan 2010, CCI Covalima rejista emprezáriu konstrusaun sivil na’in-412 aumenta ho mebel ho negosiante kiik hamutuk 2,200-resin.
Tanba impaktu hosi COVID-19 emprezáriu konstrusaun sivíl na’in-412 menus ona na’in 20-resin ne’ebé mak eziste iha Covalima, barak liu mak negosiánte kiik sira loke kioske hatama sasán hosi fronteira no seluk tan.
Jornalista : Celestina Teles
Editór : Cancio Ximenes
