COVALIMA, 26 janeiru 2023 (TATOLI)–Kámara Komérsiu Indústria Timor-Leste (CCI-TL, sigla portugés) sei kria baze dadus emprezáriu sira-ne’ebé eziste iha Timor-Leste.
“Baze dadus importante atu buka hatene emprezáriu sira iha Covalima, ita rejista iha SERVE, I.P ne’e iha emprezáriu barak maibé sira-ne’e iha duni atividade ka lae. Ita bele klasifika no hatene totál emprezáriu sira,” Prezidente CCI-TL, Jorge Manuel Serano, hateten ba Agência Tatoli iha resintu AMC, Sukaer Laran, kinta ne’e.
Razaun atu kria baze dadus, nia dehan, atu bele hatene loloos totál emprezáriu iha Timor-Leste no kada munisípiu sira ho sira-nia atividade ne’ebé mak sira hala’o ne’e oinsa no se atividade la la’o ne’e tanbasá, sira-ne’e kontribui ba impostu hira no fó empregu ba ema na’in hira.
“Ho baze dadus emprezáriu iha Timor-Leste ne’e mós ita atu bele haree forsa setór privadu nian,” nia dehan.
Nune’e, nia dehan, ho baze dadus emprezáriu sira bele identifika mós totál kompañia boot hira, mediu no kiik hira no sira hala’o atividade saida de’it.
Konaba atu hala’o baze dadus ne’e, nia hateten, bainhira hala’o konsolidasaun iha kada munisípiu ne’e hala’o hotu ona mak CCI sei halo baze dadus.
Eis Prezidente CCI Covalima, Julio do Carmo, hateten Kámara Komérsiu Indústria Timor-Leste (CCI-TL, sigla portugés) iha tinan 2010 rejista emprezáriu konstrusaun sivil hamutuk 412, tanba impaktu hosi pandemia COVID-19 mak agora emprezáriu konstrusuan sivil redús ba na’in-20.
“Iha ami-nia mandate, ami rejista emprezáriu sira la permanente konstrusaun sivil iha tinan 2010 hamutuk 412 ho projetu pakote referendu ba maluk sira-ne’ebé emprezáriu iha kioske, mebel grupu agrikultura hamutuk 2200-resin,” nia dehan.
Jornalista : Celestina Teles
Editór : Cancio Ximenes
