DILI, 26 janeiru 2023 (TATOLI)–Institutu Nacional Dezenvolvimento Mão de Obra (INDMO) entrega sertifikadu ba fornesedór formasaun profisionál inklui ekipa avaliadór hamutuk 73 ne’ebé hala’o ona servisu iha área formasaun no mós apoiu progresu servisu INDMO nian iha terrenu.
Diretór Nasionál Dezenvolvimentu Mão de Obra, Isabel Fernandes de Lima, hateten sertifikadu rekoñesimentu ne’ebé INDMO sei fó ba fornesedór no avaliadór sira-ne’e tanba konsidera formasaun mão de obra no servisu ne’ebé halo iha terrenu hatudu duni ninia rezultadu ne’ebé di’ak hodi garante kualidade iha futuru.
“Ha’u hakarak fó apresiasaun ba ekipa avaliadór sira tanba servisu makaas ne’ebé sira halo iha fulan novembru 2022, hatudu duni rezultadu di’ak,” nia hateten iha serimónia asina akordu entre INDMO no MEJD iha salaun formasaun Koléjiu Polísia Nasionál Timor Leste (PNTL, Comoro.
Nia dehan, ekipa avaliadór sira hatudu ona sira-ninia profisionalizmu hosi servisu ne’ebé sira halo merese hetan duni apresiasaun, tanba ne’e INDMO hakarak sertifika sira ho sertifikadu apresiasaun ida-ne’e hodi valoriza servisu ne’ebé sira halo ona.
Nune’e mós, ba fornesedór ka profesór sira-ne’ebé mak hala’o ona formasaun profisionál ba mão de obra hodi garante merkadu traballu ida kualidade iha futuru, INDMO mós hakarak sertifika sira ninia dedikasaun iha área formasaun sira-ne’e.
Hosi lisensa operasionál ne’ebé INDMO atribui ne’e, sira halo duni esforsu hodi halo preparasaun ba formasaun sira hodi garante produsaun mão de obra ida ho kualidade atu garante duni benefisiáriu sira ninia kompetisaun iha merkadu traballu.
“Ita-nia fornesedór sira-ne’e mós merese duni hetan atribuisaun sertifikadu hosi ita atu apresia liután sira-nia kontribuisaun iha formasaun sira-ne’e,” nia hateten.
Hosi atribuisaiun sertifikadu 73 ne’ebé INDMO sei fornese ba fornesedór avaliadór sira-ne’e kompostu hosi Sertifikadu Akreditasaun ba Tipu kursu no Nivel Formasaun hamutuk 26, Sertifikadu Lisensiamentu Operasionál 11, Sertifikadu Akreditasaun Institusionál 18 no Sertifikadu Apresiasaun ba ekipa avaliadór sira hamutuk 18.
Jornalista : Tomé Amado
Editór : Cancio Ximenes
