BAUCAU, 27 janeiru 2023 (TATOLI) – Inséndiu ne’ebé akontese iha aldeia Lamegua, suku Bahú, postu administrativu Baucau Vila rezulta uma ida hetan estragu totál.
Diretór Servisu Munisipál Protesaun Sivíl no Dezastre Naturál Baucau, Nelson Nunes, esplika, inséndiu ne’e akontese niha loron 26 janeiru purvolta oras 12:00 meudia bainhira iha membru família ida sunu lilin ne’ebé lakon kontrolo to’o mosu inséndiu ba uma.
“Vítima hamutuk ho oan ho isin lolon de’it maibé sasan uma-laran laiha ida mak salva,” Diretór Servisu Munisipál Protesaun Sívil no Dezastre Naturál informa ba Agência TATOLI iha Vila Nova, kinta ne’e
Bainhira simu informasaun ekipa protesaun sivíl liuhosi Bomeiru halo kedas intervensaun hodi hamate ahi maibé difikulta iha dalan asesu nune’e la konsege salva sasán uma-laran.
Materiál ekipamentu uma inklui dokumentu privadu ne’ebé inportante hanesan sertifikadu, diploma la konsege salva tanba kondisaun uma didin ho piku nune’e fasil ahi haan.
Uma refere komposta hosi xefe-família rua hamutuk membru família besik 10 ne’ebé kuaze maioria husik hela uma tanba hala’o atividade serbisu iha postu administrativu no balun iha Dili.
Diresaun Protesaun Sívil no Dezastre Naturál hamutuk ho Kruz Vermella Timor-Leste (CVTL, sigla Portugés) direitamente apoia emerjénsia hanesan hahaan no ekipamentu dapur ba vítima refere hodi hein apoia matérial rekuperasaun hosi nasionál.
“Ami halo kedas verifikasaun, maske dokumentu vítima hetan estragu maibé autoridade suku sei prosesu nune’e bele kompleta tuir kritéria,” Nelson Nunes akresenta.
Servisu Munisipál Protesaun Sívil no Dezastre Naturál kontinua husu ba komunidade sira atu prevene hosi sasán sira-ne’ebé risku hamosu inséndiu hanesan iskeru inklui eletrisidade tanba bele hamosu dezastre iha uma-laran.
Jornalista : Natalino Belo
Editór : Evaristo Soares Martins
