BOBONARO, 26 janeiru 2023 (TATOLI) –Ministériu Koordenadór ba Asuntu Ekonómiku (MKAE) serbisu hamutuk ho parseiru Ajénsia Internasionál Kooperasaun Japaun nian (JICA, sigla inglés), kinta ne’e fasilita formasaun jestaun armazenamentu no investáriu estoke ba funsionáriu Sentru Lojístika Nasionál (CLN, sigla portugés) no kompañia sira loke kooperativa iha postu administrativu Maliana, munisípiu Bobonaro.
Ekuantu formasaun ne’e ho objetivu atu hasa’e produtividade, seguru no kualidade ba produtu foos iha armazein ho nia maneira sira hanesan sorting (haloot), set in order (arruma tuir orden), shining (nabilan), standarizing the disipline (padraun disiplina) no sustaning disipline (mantein disiplina).
Enkuantu matéria ne’ebé implementa iha atividade refere prepara hosi peritu sira hosi Japaun ne’ebé halo observasaun ba aramazen CLN hodi haree kualidade foos ba períodu kuartu prazu nian.
Matéria ne’ebé peritu sira aprezenta foka liu ba temperatura hodi garante seguru ba foos ninia kualidade, métodu apropriadu ba armazenamentu foos inklui introdúz ekipamentu (cater content) ho lian Indonézia dehan tes kadar air.
Xefe Gabinete CLN, Vasco Cavesas de Araújo introdús kona-bá investáriu estoke iha armazein, liuliu haree atividade kontajen estoke manualmente ba produtu ne’ebé iba hodi sukat kuantidade no data manuál atu garante armazein la’o ho di’ak.
Objetivu segundu mak atu deteta lakon no ajuda mós komapañia sira hare fila-fali sistema seguransa no avalia étika traballu ba funsionáriu sira no seluk tán.
Xefe Advisor JICA, Kamiodohzono Akira, esplika projetu ne’e JICA implementa atu ajuda CLN hadi’ak kualidade foos no halo jestaun di’ak ba armazeinamentu públiku sira.
“Ami-nia projetu ne’e tinan tolu ona serbisu hamutuk ho CLN oinsá atu hasa’e produsaun foos-rai iha ba ninia tarjetu Buluto no Maliana, depois ita hasa’e produsaun ita mós sei foka ba kualidade foos, nune’e CLN bele distribui foos ho kualidade di’ak ba programa Cesta Bázika liuhosi MTCI no SEEKop,” nia imforma ba Tatoli, iha armazein CLN Maliana.
Diretór Ezekutivu CLN, Jacinto Paizo, reforsa kooperaaaun entre governu Timor-Leste ho JICA sei termina projetu fos rai iha tinan 2022 nia rohan.
Tanba ne’e JICA fasilita formasaun atu kontinua oinsá bele jere produtu sira iha armazein, liuliu liga ba estoke, tanba bainhira produtu sira-ne’e atu di’ak no kualidade depende ba jestaun sira ne’ebé iha.
“Projetu bele hotu, maibé siénsia sira fahe mai ita sei la hotu, ita mak tenke kontinua no dezenvolve nafatin, nu’udar setór privadu no mós instituisaun estadu ne’ebé mak kaer kona-ba estoke ka kooperativa. Estoke ne’e sai sasukat ida, hodi nune’e ema bele fiar estoke ho kualidade,” nia katak.
Diretór ezekutivu ne’e mós apela ba partisipante sira atu aproveita di’di’ak oportunidade ne’e tanba atividade formasaun ne’e tanba fasilita gratuita hosi JICA.
Formasaun durante loron ida ne’e partisipa hosi ema kuaze besik 20 mai hosi funsionáriu CLN Bobonaro nian, Sentru Atendimentu Agrikola Kuda Ulun Bobonaro (CAKUUB) no setór privadu sira-ne’ebé hari kooperativa.
Jornalista : Sérgio da Cruz
Editór : Evaristo Soares Martins
