Padre Arnaldo de Deus lidera parókia Numbei Oé-Cusse
OÉ-CUSSE, 26 janeiru 2023 (TATOLI) – Arkedioseze Metropolitana Dili, liuhosi Dom Virgílio Kardeál do Carmo da Silva SDB, kuarta ne’e fó pose ba Padre Arnaldo Frederico de Deus, hodi asumi kna’ar nu’udar padre parókia iha Igreja Nosa Senhora do Rosario Numbei, Oé-Cusse hodi troka Padre Albino Marques.
Molok simu pose, Padre Arnaldo Frederico de Deus asume kna’ar nu’udar Padre Pároku Atsabe, munisípiu Ermera .
Iha biban ne’e mós, Padre Pároku São Minguel Arkanjo Padia’e, Carlos De Deus simu pose, hosi Don Virgílio Kardeál do Carmo da Silva, nu’udar vigáriu foun iha uma kreda Rejiaun Administrativa Espesiál Oé-Cusse (RAEOA).
Notísia relevante: Dioseze Dili nomea Padre Arnaldo Frederico de Deus lidera eskola Katólika Oé-Cusse
Nune’e, Dom Virgílio Kardeál do Carmo da Silva SDB, reprezenta arkedioseze Dili, agradese ba padre pároku sesante dedika nia matenek durante tinan 10 hamutuk ho sarani sira iha Oé-Cusse, nune’e espera ho prezensa padre pároku foun bele hametin liután uma kreda Katólika iha Oé-Cusse.
“Ha’u husu sarani sira, ha’u entrega padre foun, ha’u husu ba ita-boot sira loke liman serbisu hamutuk ho nia, nune’e buat-ne’ebé ita hakarak halo iha uma kreda ne’e, bele fó liman ba malu,” Dom Virgílio Kardeál do Carmo da Silva, apela ne’e iha misa agradesimentu ne’e.
Padre Arnaldo Frederico de Deus, agradese ho fiar ida-ne’e, nune’e nia promete sei serbisu hamutuk ho entidade sira hotu hodi hatudu ezemplu di’ak iha Oé-Cusse nu’udar odamatan relijiaun Katólika Timor-Leste nian.
“Ha’u sente hanesan oportunidade osan mean ida, tanba mai serbisu iha rai istóriku odamatan uma kreda Timor-Leste nian, ha’u simu mós apoiu hosi padre pároku sesante hamutuk ho padre pároku sira hotu, hamutuk ho amu vigáriu foun hodi bele hatudu ezemplu ho fuan no fuan di’ak ba igreja Katólika ba sarani sira iha Oé-Cusse,” Padre Arnaldo Frederico de Deus.
Nia husu sarani hotu nia kolaborasaun, nune’e mós husu padre no madre sira mai hosi kongregasaun hotu-hotu no Autoridade RAEOA atu bele serbisu hamutuk.
“Ha’u mai iha Igreja pároku Numbei la’ós atu fahe imi, maibé mai atu kontribui saida mak halo ona no saida mak seidauk halo ho objetivu atu harii dame hamutuk ho sarani sira hodi hateke ba futuru nia di’ak,” nia katak.
Padre Albino Marques, agradese mós ba dioseze Dili tanba simu fiar durante tinan 10 hamutuk ho sarani sira Oé-Cusse, hodi haklaken doutrina Maromak nian iha iha Igreja Parokia Nossa Senhora do Rosário Numbei, Oé-Cusse.
“Ha’u hakarak hato’o obrigadu barak ba inan-aman sira, katekista, estrutura parókia, padre parókia no madre sira, durante tinan 10 ita hamutuk, iha mós sala ne’ebé ha’u halo ba imi ho fuan ha’u husu perdaun. Ha’u fiar no sei reza atu serbisu hamutuk ho padre parókia foun nune’e bele hetan dame no pás nafatin iha Oé-Cusse,” nia katak.
Notísia relevante: Irmán na’in-rua simu votu perpétua hosi Dom Virgílio iha RAEOA
Jornalista : Abílio Elo Nini
Editór : Evaristo Soaress Martins
