PR Horta-Embaixadór Indonézia diskute prosesu adezaun TL ba ASEAN
DILI, 26 janeiru 2023 (TATOLI)–Prezidente Repúblika (PR), José Ramos Horta, kinta ne’e, hasoru malu ho Embaixadór Repúblika Indonézia iha Timor-Leste, Octo Dorinus Manik, hodi diskute kona-ba prosesu adezaun Timor-Leste ba ASEAN.
“Hasoru malu ho Prezidente ne’e ko’alia foka liu ba adezaun Timor-Leste ba ASEAN. Ida-ne’e hanesan diskusaun no konsultasaun ho Prezidente, tanba iha prosedimentu balun ne’ebé Timor-Leste tenke tuir,” Embaixadór Octo Dorinus Manik hateten hafoin ramata enkontru ho Xefe Estadu, iha Palásiu Prezidensiál Nicolau Lobato, Bairru Pite.
Tuir planu, delegasaun ida hosi Timor-Leste sei desloka iha fulan-fevereiru nia laran bá Indonézia, hodi diskute detalla prosedimentu ne’ebé Timor-Leste presiza kumpre, atu sai membru permanente ba organizasaun rejionál ne’e.
“Sei iha proseu detallu no mós sei iha planu vizita delegasaun hosi Timor-Leste ba Jakarta, atu haforsa prosesu adezaun TL ba ASEAN. Indonézia sai ona Prezidénsia rotativa ASEAN dezde janeiru, maibé atu Timor-Leste sai membru ne’e, iha matadalan no matadalan ne’e sei diskute ho kolega sira iha Jakarta,” nia hateten.
Nia fiar, vizita delegasaun bá Jakarta sei ajuda Timor-Leste, atu sai preparadu liután no kumpre rekezitu sira-ne’ebé ASEAN aprezenta.
Antes ne’e, Diretór Jerál ba Asuntu ASIA Pasífiku no Áfrika, hosi Ministériu Negósiu Estranjeiru no Kooperasaun Indonézia, Abdul Kadir Jailani, hasoru malu ho Prezidente Repúblika, José Ramos Horta, hodi diskute kona-ba reforsu kooperasaun iha área ekonomia no adezaun Timor-Leste ba ASEAN.
Jornalista : Nelson de Sousa
Editór : Cancio Ximenes
