VIQUEQUE, 26 janeiru 2023 (TATOLI)-Koordenadór Konstrusaun Jornada Rezistésia Edimumu, atuál Xefe Suku Afaloikai, Postu Uatulari, munisípiu Viqueque, Constantino Guterres, informa progresu konstrusaun fiziku sítiu istóriku Jornada Rezisténsia antigu Falintil Karauk Fuik Edimumu, iha Postu Administrativu Uatulari atinje ona 25%.
“Kona-ba konstrusaun sítiu istóriku Jornada Rezisténsia sai fatin turizmu Edimumu, daudaun atinje ona 25%, tanba ami halo fondasi no orientasaun ne’ebé ami iha ba konstrusaun ne’e durante fulan tolu tenke finaliza”, Koordenadór ne’e hateten ba Agência TATOLI, iha suku Afaloikai, kinta ne’e.
Konstrui sítiu ne’e hahú iha fulan dezembru 2022 no sei ramata iha fulan marsu 2023. Fundu husi Ministériu Komérsiu, Indústri no Turizmu (MTKI) no ba pagamentu faze dahuluk 40% ba responsável ho montante $16.500
“Dezafiu serbisu ne’ebé maka ami hasoru daudun ne’e, materiál konstrusaun tanba folin sa’e no dezafiu seluk klíma hanesan udan mak difikulta ba prosesu konstrusaun, maibé ami fiar katak fulan-marsu ami sei finaliza konstrusaun ba sítiu ne’e”, nia promete.
Sítiu jornada rezisténsia kria mós estatua saudozu Dara Loi, ne’ebe daudaun ne’e responsável halo ona ninia fondasi, hafoin ramata sei lori estatua saudozu nian mai hodi tau iha sítiu no pakote ida maka haris fatin.
“Maibé, ita ko’alia fatin turizmu sei presiza fasilidade sira hanesan fatin deskansa, moru protesaun ida-ne’e ami seidauk halo, aban bain-rua ida agora hotu lai. Pakote sira seluk ne’e, ami hein desizaun husi Governu sentral hodi kompleta sítiu”, nia realsa.
Konstusaun ne’e, nia dehan Governu halo kontratu ba badaen sira no komunidade hosi suku neen serbisu ho voluntariu tanba sítiu turistiku ne’e la’os ema ida nian, maibé ba postu Uatulari nian hotu.
Jornalista : Vitorino Lopes da Costa
Editór : Florencio Miranda Ximenes
