DILI, 26 janeiru 2023 (TATOLI)— Diretór Ezekutivu Servisu Sosiedade Sivíl no Auditória Sosiál iha Gabinete Primeiru Ministru (SASCAS-PM, sigla portugés), Edvin Soares Noronha, hateten, prosesu konstrusaun ba Pura Girinatha iha Taibessi Dili daudaun ne’e atinje ona 90%.
Edvin Soares Noronha hateten, relatóriu kona-ba atinjimentu ba Pura Taibesi ne’e sira-nia parte hetan hosi Asosiasaun Antigu Alunu Universidade Udayana Timor-Leste (IKAYANA-TL) no SASCAS rasik sei halo konfirmasaun fali ba Ajénsia Dezenvolvimentu Nasional (ADN) hodi haree nia prosesu sira ne’e.
“Rezultadu hosi IKAYANA hateten prosesu konstrusaun ba Pura Taibesi ne’e daudaun atinje ona 90% ho rezultadu ida ne’e ita sei fó fali ba ADN hodi halo verifikasaun nia konstrusaun fíziku ba Pura ne’e rasik hodi hapár fali rezultadu ne’ebé ita hetan ne’e hanesan ka lae,” Edvin Soares Noronha hateten ba Agência Tatoli, iha nia knaar-fatin Palásiu Governu, kuarta ne’e.
Governu liuhosi SASCAS iha tinan 2021 apoiu fundu ba projetu ne’e hamutuk milliaun $1.207.958,18 no iha tinan 2021 ne’e duni ADN sertifika progresu Pura Taibessi atinje 87.7%.
Parte seluk, Diretór Ezekutivu Asosiasaun Turizmu Relijiozu Timor-Leste (ATR-TL) Manuel Vong, hateten, sira-nia parte mós kontinua halo monitorizasaun ba Pura Girinatha ne’e tanba Pura ne’e rasik nu’udar fatin úniku ba maluk sira Hindu iha Timor-Leste.
“Pura Taibesi aleinde, fatin istóriku ne’ebé ita tenke proteje, fatin refere sai sai sentru turístika ba relijiaun Hindu boot iha Timor-Leste,” Manuel Vong, hateten liuhosi entrevista eskluzivu iha Tatoli.
Antes ne’e, Koordenadór Relijiozu Hindu iha ATR-TL, Iputu Ari Sanjaya, hateten, bainhira konstrusaun Pura Taibesi remata, fatin refere sei sai fatin hasa’e orasaun hosi fiar Hindu nian iha Timor-Leste, maibé Pura ne’e rasik la’os Hindu hosi Bali Indonézia de’it maibé mós reprezenat ba mundu tanba iha maluk Hindu balu maihosi Índia, Nepal, Malásia no seluk tan.
Komunidade Hindu iha Timor-Leste rasik servisu hamutuk ho Governu Indonézia hodi halo promosaun Pura Girinatha Taibessi sai hanesan fatin turizmu ne’ebé aumenta fatin turistiku sira iha Timor-Leste.
Aleinde, Pura Girinatha iha Taibesi Dili, mós pura sira seluk iha territóriu laran hanesan, Baucau, Ermera, Bobonaro, Covalima, Manufahi Same, Liquiça no Viqueque ne’ebé iha desde tempu Indonézia.
Jornalista : Arminda Fonseca
Editora : Armandina Moniz
