COVALIMA, 26 janeiru 2023 (TATOLI)– Reprezentante komandante PNTL munisípiu Covalima, Inspetór Xefe Polísia Joaquim da Costa, informa situasaun seguransa jerál iha munisípiu Covalima oras ne’e daudaun la’o hakmatek.
“Ita ko’alia estabilidade seguransa iha ita-nia munisípiu Covalima, oras ne’e daudaun sei la’o di’ak, kalma no hakmatek. Maske iha fatin balun mosu perturbasaun hanesan kazu omésidiu ita akompaña iha Dili, situasaun ida mai ita oinsá mak ita preokupa no fó hanoin, konsidera importante liu ba estabilidade,” Inspetór Xefe Polísia Joaquim da Costa informa situasaun ne’e iha diskursu bainhira CCI-TL hala’o konferénsia munisípal ba dala-IV, iha salaun AMC Covalima, kinta ne’e.
Nia dehan, situasaun ida-ne’e ema hotu nia preokupasaun partisipasaun idea hanoin oinsá mantein estabilidade iha ida-idak nia munisípiu no bairru atu konsensializa joven sira.
“Ita-nia estabilidade iha ita ida-idak nia munisípiu no bairru sira bele konsensiáliza ita-nia joven sira-ne’ebé iha munisípiu Covalima, ami bele dehan katak la’o hakmatek,” nia hateten.
Maske ho situasaun balun estudante-sira na’in-ida ka rua asalta malu ne’e normál, tanba sira hakarak hatudu sira-nia arte ne’ebé sira apreende hodi aplika hasoru maluk sira seluk ne’e, tanba la prejudika atividade hotu iha Covalima.
Ho nune’e, PNTL kontinua hala’o atividade polisiamentu komunitáriu koñese ho matadalan Vijibilidade Involvimentu ho Profisionál (VIP) no asaun ida-ne’e hala’o iha Covalima liuhosi servisu polísia suku sira.
Tuir konstituisuan RDTL artigu 147 ko’alia kona-ba polísia no forsa seguransa ne’ebé alinea dahuluk hateten Polísia sei defende legalidade demokrátiku no garante sidadaun sira-nia seguransa internu maibé sira labele iha partidu polítiku.
Iha Alinea 2 hateten, prevensaun kriminál tenke hala’o ho respeitu ba direitu umanu no Alinea 3 haktuir lei mak sei harii rejime ba polísia no mós forsa seguransa seluk.
Tuir dadus ne’ebé fó sai, iha tinan 2021, PNTL estabelese ona konsellu Polisiamentu Komunitária (KPK) iha suku 16 no falta de’it suku 10 atu kompleta iha suku 30 ne’ebé iha Covalima.
Jornalista : Celestina Teles
Editór : Cancio Ximenes
