OÉ-CUSSE, 27 janeiru 2023 (TATOLI) – Autoridade Rejiaun Administrativa Espesiál Oé-cusse Ambeno (RAEOA) lideradu Arsénio Paixão Bano, planeia iha tinan ne’e sei moderniza embun Kiubaki ne’ebé konstrui iha aldeia Bonemese, suku Naimeko hodi fornese ba komunidade sira atu utiliza ba nesesidade família nian.
Iha sesta ne’e, Prezidente Autoridade RAEOA, Arsénio Paixão Bano hamutuk ho xefe suku Naimeko, Marcos Liu, akompaña hosi Sekretáriu Rejionál ba Asuntu Agrikultura, José Eta, hala’o vizita ofisiál ba enbun ne’e hodi haree direita kondisaun embun ne’e rasik, nune’e iha futuru bele hadi’a atu fornese ba komunidade sira hodi utiliza tuir nesesidade.
Iha biban ne’e, Arsénio Bano, informa, projetu embun ne’e hari tinan haat kuaze tinan haat ona, iha mandatu Presidente Autoridade, Mari Alkatiri, liuhosi eis Sekretáriu Rejionál Agrikultura Regio Da Cruz Salu.
“Ohin ita mai haree nia kondisaun iha duni rezultadu, konserva duni bee-moos, entaun mai haree atu hadi’a moderna bele kanaliza tán ba komunidade sira hosi uza ba atividade ortikultura, animál sira inklui komunidade bele uza tuir nesesidade ne’ebé iha, ita sei reforsa no halo manutensaun,” Arsénio Paixão ko’alia iha suku Naimeko.
Iha tempu badak, Autoridade RAEOA sei dezloka tékniku sira tantu Diresaun Agrikultura no Diresaun Rejionál Infraestrutura, atu halo levantamentu dadus, depois maka tama ba faze implementasaun kanalizasaun ba komunidade.
Xefe suku Naimeko, Marcos Liu, hatete, durante ne’e komunidade kontribui ona halo servisu voluntáriu hodi kuda ai-oan haleu, nune’e bele sustenta bee iha tempu naruk.
“Durante ne’e komunidade barak mak uza ona, tanba ne’e lokaliza iha fronteira entre aldeia Bonemese no Teina’e, entaun komunidade ne’ebé badinas, bele uza hodi kuda modo no iha tempu bailoron uza fó hemu ba animál sira, maibé ohin Autoridade mai haree ona atu kontinua kanaliza ba komunidade sira uza bee hemu, tanba ne’e konstrui iha foho ai laran, ne’ebé bee ne’e moos hela,” nia katak.
Entretantu projetu embun ne’e lokaliza iha bairru Oélfeub-Kiubaki, suku Naimeko sub-rejiaun pante Makasar, Autoridade RAEOA konstrui iha 2017 liuhosi Diresaun Rejionál Agrikultura no Dezenvolvimentu Rurál, Departamentu Irrigasaun Jestaun Distribuisaun Água, hosi sai hanesan sistema naturál retensaun bee rai okos no udan-been bazea ba contour.
Objetivu hosi projetu ne’e, atu fornese bee ba produsaun agrikultura no ortikultura, bee-hemu ba ema no animál, ho nia kle’an metru neen (6) no haleu metru 180.
Jornalista: Abílio Elo Nini
Editór: Evaristo Soares Martins
