BAUCAU, 27 janeiru 2023 (TATOLI) – Autoridade lokál suku Gariuai, husu governu konsidera joven Gariuai iha rekrutamentu membru FALINTIL-Forssa Defeza Timor-Leste (F-FDTL) iha períodu tuir mai.
Xefe suku Gariuai, postu admistrativu Baucau vila, Arlindo Belo Freitas, esplika, suku Gariuai maioria idade produtivu maibé durante prosesu rekrutamentu seidauk iha joven hosi suku refere mak sai forsa armada iha Timor-Leste.
“Rekrutamentu beibeik ona, kuaze joven Gariuai besik atus rua maibé naran la pasa, lahatene tanba razaun saida maibé ami konsidera ne’e diskriminasaun,” Xefe suku Gariuai hateten iha aldeia Maucale, sesta ne’e.
Autoridade suku sempre simu lamentasaun hosi joven Gariuai kona-bá prekupasaun no prosesu rekrutamentu tanba maioria juven hakarak kontribui ba Timor-Leste liuhosi institusaun Forsa Armada.
Nune’e, autoridade suku iha sesta, 27 fevereiru direitamente husu ba xefe governu, Taur Matan Ruak, atu konsidera pedidu ne’e.
Arlindo Freitas argumenta, maske pasadu Gariuai koñesida ho brutalizmu maibé atuál hakarak asesu ba kampu traballu liuhosi kontribuisaun iha F-FDTL.
Primeiru Ministru Taur Matan Ruak, responde prekupasaun ne’e no kompromete atu hato’o direita ba Ministériu Defeza no institusaun F-FDTL hodi konsidera joven Gariuai bainhira iha rekrutamentu ba membru foun iha futuru.
Xefi governu husu joven Gariuai kontinua kontribui ba pás nune’e bele prienxe rekizitu hosi ekipa komisaun bainhira iha rekrutamentu kadetes foun.
“Hau konsellu ba oan sira atu kuida aan tanba ne’e labele hemu tua no fuma, atu saúde di’ak, se lae problema,” Taur Matan Ruak hateten.
Suku Gariuai komposta hosi aldeia Ualu hanesan Gariuai, Bahamori, Uabiana, Darasula, Cairiri, Maucale, Uabiana, Uatuwa no Uaturau ho totál populasaun 6.030 hosi uma-kain 1.137.
Jornalista : Natalino Belo
Editór : Evaristo Soares Martins
