DILI, 27 janeiru 2023 (TATOLI)—Governu liuhosi Ministériu Turizmu Komérsiu no Indústria (MTKI), selu ona kompaña manán na’in ba distribuisaun programa Cesta Bázika hamutuk 52.
Bazeia ba nota komunikadu ne’ebé Agência Tatoli asesu sesta ne’e, fo sai katak, kompañia 52 ne’ebé hetan ona pagamentu hosi MTKI mak hanesan, Leader, Hanaroman Brilhante, Bobolait, Betuhei, Atauro Agrobisnis Leovima Nalo, Jaque, D-Mart, Zhavia, Onze Menus Dois, Nahliva, Mahal, Parapa Remiziu, Ira-Mer, Seroca 21, Nilrilays, Zicxon, Jumar, Arapilotem, Behale Enterprices, Loverbalega, Ermera Tuan, Hilunorovel, Maphil, Dirhati, Marisson, Lanicia, Eliezer, CP, BNT, no Aibau-Riverside.
Nune’e, ba kompania Katuas Patricio, Vinte de Maio, Mutyneoho’o, Eternity, Zyahfast, The New Brotherhood, GEZ, Bryan & Britany, Ruzizato Dover, K2K, Vinximen 28, Amigo, Jujudosa Levena, Loeai Jevaya, Ekapu Futuneru, Garraf, Mira Mar, Maibasar 20, Sayunoli, FM Diena, Sevestar Dini, Werlionic, Celena CSJ, Irafaguanei no empreza FU.
Notisia relevante : Governu prolonga programa distribuisaun Cesta Bázika to’o marsu 2023
Kompañia sira ne’ebé MTKI kontratu hodi halo distribuisaun Cesta Bázika ne’e, hamutuk 94 ne’ebé no hosi númeru ne’e 52 mak selu hotu ona no restu sira ne’e balu foin selu metade.
Nune’e kompañia sira ne’ebé hetan kontratu hosi MTKI daudaun ne’e empreza Atauro Agrobisnis Lda ne’ebé responsabiliza ba munisípiu Ataúro finaliza ona distribuisaun Cesta Bázika hodi fahe ba benefisiáriu hamutuk 11.558 maihosi suku Beloi, Macadade, Biqueli, no Vila Maumeta. Hosi totál ne’e komunidade kuaze 200 resin maka reklama sira nia direitu ba ministériu hodi responde.
Ba munisípiu sira seluk ne’ebé Ekipa Sekretariadu Cesta Bázika MTKI kontinua halo distribuisaun, mak hanesan Bobonaro, Dili, Liquiça, no Ermera nune’e ba iha Rejiaun Administrativu Espesiál Oecússe Ambeno (RAEOA) iha ona prosesu asina kontratu hodi distribui Cesta Bázika.
Programa distribuisaun Cesta Bázika ne’e rasik, antes define to’o 31 dezembru 2022 maibé foin lalais ne’e Governu liuhosi Konsellu Ministru prolonga tan to’o 30 maiu 2023, nune’e populasaun hothotu hetan nia direitu.
Dadus ne’ebé antes fó sai distribuisaun Cesta Bázika iha territóriu laran parte MTKI atinje ona 90% no parte Sekretária Estadu Koopeativa (SECoop, sigla portugés), atinje ona 70%.
Notisia relevante : Bobonaro : Abitante 1.805 iha Holsa naran laiha lista simu Cesta Bazíka
Nune’e tuir dekretu lei númeru 10/2022 loron 4 marsu entidade implementadór mak MTKI no Sekretária Estadu Kooperativa (SECoop,sigla portugés). Tuir lei ne’e, MTKI nia responsabel distribui ba komunidade sira hosi munisípiu lima mak hanesan Atauro, Bobonaro, Dili, Ermera, Liquiça no Rejiaun Administrasaun Espesiál Oecusse Ambeno (RAEOA) ho totál orsamentu milliaun $40.
Jornalista : Arminda Fonseca
Editora : Armandina Moniz
