DILI, 27 janeiru 2023 (TATOLI)—Sekretária Ezekutiva Sekretariadu Tékniku Programa Nasionál Dezenvolvimentu Suku (ST-PNDS), Claudinha Soares Pinto, hateten konstrusaun Uma Kbiit Laek (UKL) tinan 2021 ne’e atinje ona 97%.
Notísia Relevante: UKL 2021 hela 2% mak seidauk konklui
“Konstrusaun Uma Kbiit Laek iha 2021 ne’e 97%. Ita konstrui ramata ona no falta de’it ona pursentu kiik-oan atu ramata ona. Maibé ha’u hanoin ekipa jestaun liu-liu hamutuk ho xefe suku no benefisiáriu hakarak uma ne’e finaliza iha 2021, maibé problema iha benefisiáriu balun hela iha fatin izoladu no labele asesu dalan,” Sekretária ezekutiva ST-PNDS ne’e hateten ba Agência Tatoli liuhosi programa “Entrevista Eskluziva” ho tema “Implementasau PNDS no UKL ka UNP” iha studio Faról, sesta ne’e.
La asesu dalan ne’e mak sai kestaun boot ba ekipa tékniku Programa Nasionál Dezenvolvimentu Suku (PNDS) atu halo atividade konstrusaun tanba tuir polítika VIII Governu Konbstitusionál nian katak tenke halo uma iha benefisiáriu nia hela fatin.
“Entaun hakarak ka lakohi ami tenke to’o iha fatin ne’e hodi halo avaliasaun kondisaun realidade uma ne’e nian, hanesan iha suku Soba, postu adminsitrativu Laga, munisípiu Baucau nian ne’ebé la asesu dalan, ita la’o de’it kuaze oras haat nia laran mak foin to’o iha suku refere,” nia dehan.
Maibé, nia esplika, atu solusiona ona problem aida-ne’e ekipa tékniku PNDS buka ona dalan hodi lalin materiál ba fatin no hetan apoiu hosi komunidade no benefisiáriu ho nia família, taha la asesu dalan ne’e la signfika atu esklui tiha benefisiáriu ne’e maibé nia mos iha direitu hanesan sira seluk.
Tuir nia, ba benefisiáriu sira-ne’ebé dook hosi Estrada ne’e, ekipa teknika PNDS sei muda modelu no tipu uma kbiit laek tanba kestaun materiál konstrusaun ne’ebé sosa no lori dook tanba la asesu dalan.
“Ho atividade ne’e ami kontinua aproxima ho komunidade maske ami sente kolen tanba dook hosi dalan, maibé ami nafatin esforsu atu termina tinan ne’ebé iha. Maibé ba suku balun la besik estrada ami husu para halo uma diferensa uitoan mak atu opta tipu Uma Kbiit Laek tipu A nian, entaun nia kustu la dook hosi UKL regulár no ami halo ajustamentu kiik-oan, nune’e balansu hosi osan ne’e ami uza ba kustu transporte nian hodi selu karregadór hodi foti sasán to’o iha benefisiáriu nia fatin,” nia hateten.
Sekretária Ezekutiva ne’e esplika katak ida-ne’e mak ekipa halo nune’e bele finaliza tanba laiha kustu seluk ne’ebé aloka ba atividade ne’e.
Osan alokadu ba Uma Kbiit Laek hosi 2012 hamutuk millaun $25 ba uma hamutuk 1.254 territóriu nasionál no kada suku iha uma tolu.
Notísia Relevante: Konstrusaun UKL 2021 iha suku haat seidauk finaliza
Jornalista : Osoria Marques
Editór : Cancio Ximenes
