DILI, 01 Juñu 2026 (TATOLI)–Sekretáriu Estadu Komunikasaun Sosiál (SEKOMS), Expedito Dias Ximenes, husu funsionáriu públiku no ajente Estadu sira servisu ho responsabilidade atu mellora dezempeñu ezekusaun OJE 2026 ho di’ak liután.
“Iha prosesu konstrusaun Estadu ho nasaun, papel funsionariu públiku no ajente Estadu importante tebes iha prosesu konstrusaun nasaun,” Sekretáriu Estadu Komunikasaun Sosiál, Expedito Dias Ximenes, hateten iha nia diskursu bainhira sai inspetór isár bandeira iha fulan-Juñu nia hahú, iha Palásiu Governu, ohin.
Iha fulan neen nia laran, husi avaliasaun dezempeñu ne’ebé hala’o husi Ministeriu Finansa kona-ba Governu nia ezekusaun iha trimestre dahuluk to’o iha fulan-Maiu foin atinje 30%, ne’e signifika katak presiza servisu maka’as liután.
Hanesan servidor Estadu, tuir nia, bainhira funsionáriu sira fó atendimentu ne’ebé mak di’ak ba komunidade, funsionáriu sira mós tenke refleta katak tenke servisu ho dixipliña signifika tenke tama servisu hatudu ida-idak nia produtividade tuir oras ne’ebé determina ona.
Tanba, nia dehan, iha avansa teknolojia oras ne’e daudaun ne’ebé Governu no Estadu tau fasilidade oioin inklui internet, hodi ajuda funsionáriu no ajente Estadu sira-nia servisu loro-loron, entaun fasilidade sira-ne’e atu uza hodi hasa’e liután servisu ho kualidade.
“Avansu teknolojia oras ne’e daudaun ita tenke uza ho di’ak, tanba sistema teknolojia foun hanesan Artificiál Intelligence (AI) bele lori oportunidade ba ita maibé mós lori risku ba ita,” nia dehan.
Tamba ne’e, nia hateten, aproveita oportunidade ida-ne’e liuliu ba entidade Estadu atu uza mídia sosiál ho responsabilidade no saudavel.
Jornalista : Alexandra da Costa
Editór : Cancio Ximenes
