MEJD aloka millaun $30 konstrui infraestrutura eskolár iha 2023
BAUCAU, 27 janeiru 2023 (TATOLI) – Governu liuhosi Ministériu Edukasaun, Juventude no Desportu (MEJD) aloka orsamentu millaun $30 hodi konstrui no reabilita infraestrutura eskolár iha tinan-2023.
Liuhosi orsamentu Jerál Estadu (OJE) tinan-2023, MEJD hetan alokasaun hamutuk millaun $15 ba programa infraestrutura edukativa no fundu emprésimu hosi Banku Munidiál besik millaun $15 nune’e totál millaun $30 hodi rezolve infraestrutura bázika eskolár iha territóriu nasionál.
“Ho orsamentu ne’e ita espera bele harii no reabilita hamutuk entre 200 to’o 300 eskola iha tinan-ne’e,” Ministru Edukasaun, Juventude no Desportu (MEJD), Armindo Maia hateten iha Maucale, Gariuai, sesta ne’e.
Hosi totál eskola hirak-ne’e tuir planu sei konstrui no reabilita sala aula besik 700 nune’e bainhira mandatu VIII governu remata sei hadia sala aula hamutuk 1.500 hosi eskola 500.
“Maske tinan badak, ita espera katak bele hala’o tuir planu,” Armindo Maia akresenta.
MEJD kontinua identifika edifísiu eskola sira-ne’ebé hetan estragu nune’e fim do ano tinan-2023 liuhosi orsamentu ne’ebé aloka bele rezolve ona infraestrutura eskolár hamutuk pursentu 70 iha territóriu nasionál.
Governu iha tinan-2022 aloka orsamentu hamutuk milaun $29-resin hodi implementa Projeitu Konstrusaun no Reabilitasaun (PKRE) ho totálal projetu hamutuk edifísiu 228 komposta hosi konstrusaun foun 218 hanesan sala aula 754, sala profeór 93 no hariis-fatin 81 no reabilitasaun hamutuk eskola 10 komposta hosi sala aula 57, sala profesór 5 no hariis-fatin 3.
Projetu refere finaliza ona iha teritóriu hotu hamutuk edifísiu 94, komposta hosi munisípiu Aileu 7, Ainaro 6, Baucau 17, Bobonaro 11, Covalima 8, Dili 7, Ermera 5, Lautém 5, Liquiçá 4, Manatuto 3, Manufahi 6, no Viqueque 7.
Seidauk finaliza hamutuk 203 komposta hosi munisípiu Aileu 14, Ainaro 16, Baucau 29, Bobonaro 21, Covalima 16, Dili 16, Ermera 19, Lautém 16, Liquiçá 13, Manatuto 10, Manufahi 15, Viqueque 18 no 8 sei iha faze finalizasaun.
Notísia relevante: Sala aprendizajen tolu iha EBF Daitula Maucale Baucau aat
Jornalista : Natalino Belo
Editór : Evaresto Soares Martins
