BAUCAU, 27 janeiru 2023 (TATOLI) –Primeiru Ministru (PM), Taur Matan Ruak, sesta ne’e inaugura Projeitu Konstrusaun no Reabilitasaun (PKRE) iha edifísiu eskola Báziku Filiál (EBF) Daitula Maucale, suku Gariuai, postu administrativu Baucau Vila.
Primeiru Ministru, Taur Matan Ruak, louva ho implementasaun PKRE liuliu komunidade implementadór tanba bele finaliza infraestrutura eskola iha territóriu nasionál hodi hadi’a setór edukativa iha Timor-Leste.
“Edukasaun inportante tanba ne’e dezenvolmemtu infraestrutura no sistema tenke fó atensaun maka’as atu eleva kualidade edukasaun iha ita-nia rai,” Primeiru Ministru hateten iha EBF Daitula Maucale, suku Gariuai, sesta ne’e.
Maske VIII governu hasoru impase polítiku, Covid-19 no dezastre naturál maibé iha tinan-2022 governu hahú konstrui infraestrutura edukasaun liuliu eskola hotu no tuir trajetu iha tinan-2023 remata sei finaliza konstrusaun eskola purvolta besik 500 iha territóriu nasionál.
Inagurasaun faze dahuluk iha EBF Daitula refere edifísiu ida kompostu sala aula tolu no edifísiu profesór ida ho orsamentu hamutuk $ 83.515,23 no simbolikamente entrega mós kadeira no meza hodi fasilita prosesu aprendizajen iha eskola refere.
Governu hili EBF David Alex ‘Daitula’ hodi halao inaugurasaun ba totál projetu ne’ebé finaliza ona iha territóriu hotu hamutuk 94 kompostu hosi munisípiu Aileu 7, Ainaro 6, Baucau 17, Bobonaro 11, Covalima 8, Dili 7, Ermera 5, Lautém 5, Liquiçá 4, Manatuto 3, Manufahi 6 no Viqueque 7.
Ministru Edukasaun, Juventude no Desportu (MEJD), Armindo Maia, hateten, governu kontinua implementa programa importante hanesan infraestrutura ne’ebé sai prioridade dahuluk, dezenvolmemtu no reforsa kurrikulár no tau matan ba rekursu estudante no profesór inklui jestaun eskola hodi asegura inkluzividade.
“Edukasaun mak xave ba dezenvolvimentu sosiál no ekonomia nasaun, nune’e MEJD kontinua hadi’a kualidade edukasaun ne’ebé sustenável hodi hamosu rekursu umanu iha área oinoin,” Armindo Maia akresenta.
Projetu ne’ebé seidauk finaliza hamutuk 203 komposta hosi munisípiu Aileu 14, Ainaro 16, Baucau 29, Bobonaro 21, Covalima 16, Dili 16, Ermera 19, Lautém 16, Liquiçá 13, Manatuto 10, Manufahi 15, no Viqueque 18 no 8 sei iha faze finalizasaun.
Tótal projetu konstrusaun eskola foun no reabilitasaun tinan 2021-2022 hamutuk 228 komposta hosi konstrusaun foun 218 hanesan sala aula 754, sala profeór 93 no haris fatin 81.
Enkuantu reabilitasaun hamutuk eskola 10, sala aula 57, sala profesór 5 no hariis fatin 3.
Prosesu projetu konstrusaun no reabilitasaun eskolár (PKRE) finansia hosi governu liuhosi MEJD hamutuk hotu millaun $29-resin ho totál orsamentu aloka ba munisípiu Baucau $3.001.683,69 hosi eskola hamutuk 29 fahe ba projetu hosi emprezáriu hamutuk 26 no projetu komunitária hamutuk 202.
Jornalista : Natalino Belo
Editór : Evaristo Soares Martins
