iklan

EKONOMIA, BAUCAU, HEADLINE, MUNISÍPIU

Reabilitasaun sede suku Gariuai sei finaliza iha tempu badak

Reabilitasaun sede suku Gariuai sei finaliza iha tempu badak

Sede Suku Gariuai, postu administrativu Baucau Vila, munisípiu Baucau. Imajen Agência TATOLI/Natalino Belo.

BAUCAU, 27 janeiru 2023 (TATOLI) – Progresu Reabilitasaun Sede Suku  (RSS) Gariuai, postu administrativu Baucau vila hein faze finalizasaun.

Xefi suku Gariuai, Arlindo Belo Freitas, esplika, projetu refere daudaun ne’e atinje ona pursentu 90 implementa liuhosi Programa Nasionál Dezenvolvimentu Suku (PNDS) ne’ebé hetan alokasaun orsamentu $13.000.

Xefi suku Gariuai, Arlindo Belo Freitas. Imajen Agência TATOLI/Natalino Belo.

“Ami hein konklui tán buat balun tán no sei finaliza iha tempu badak,” Xefe suku Gariuai hateten iha Maucale, sesta ne’e.

Autoridade suku Gariuai hetan mós alokasaun fundu kontinjénsia hodi konstrui moru haleu no sala enkontru $ 29.000 no orsamentu restu rihun $5-resin no sei utiliza ba serimónia inaugurasaun programa RSS.

Autoridade lokál suk Gariuai tuir planu sei hakerek karta ofisiál ba Primeiru Ministru Taur Matan Ruak liuhosi Gabinete Primeiru Ministru atu direitamentu halo inaugurasaun ba sede suku refere.

Arlindo Freitas konsidera ho reabilitasaun sede suku no konstrusaun moru haleu inklui reabilitasaun sala inkontru fasilita ona prosesu administrasaun no atendimentu iha suku.

Suku Gariuai komposa hosi aldeia ualu hanesan Gariuai, Bahamori,Uaturau, Maucale, Cairili, Uaibiana, Uatuwa, no Darasula ho totál populasaun 6.030, komposta hosi mane 3.006 no feto 3.024 hosi xefe família 1.137.

Jornalista    : Natalino Belo

Editór           : Evaristo Soares Martins

iklan
iklan

Leave a Reply

iklan
error: Content is protected !!