DILI, 27 janeiru 2023 (TATOLI) – Xefe Departamentu Moras Lahada’et iha Ministériu Saúde (MS) Hector da Costa Pereira, hateten sentru hapara fuma funsiona ona iha Munsípiu Liquiça, Ermera, Ainaro no Rejiaun Administrativa Enklave Oe-Cusse Ambeno (RAEOA).
“Munisípiu ne’ebé funsiona ona sentru hapara fuma mak Liquiça, Ermera, Ainaro no RAEOA, ho objetivu katak atu hapara fuma”, Xefe Departamentu Moras Lahada’et iha MS Hector da Costa Pereira, dehan iha salaun esperansa Elemloi, ohin.
Nia dehan kona-ba medikamentu no ekipamentu sufisiente atu halo tratamentu ba ema ne’ebé hakarak hapara fuma tanba durante profisionál saúde fó konsellu no tratamentu tuir grau krónika husi sira nia fuma.
“Kona-ba dadus ba sentru hapara fuma hosi munisípiu haat, ha’u seidauk rekolla ema hira mak hapara ona fuma maibé tempu badak ita sei asesu”, adianta nia.
Nia rekorda katak iha tinan kotuk, MS estabelese no estensaun ba sentru hapara fuma ba munisípiu haat no munisipiu seluk iha ona prosesu nia-laran.
MS estabelese sentru hapara fuma iha 2021, iha Munisípiu Dili no konsegue fó tratamentu ba pasiente para fuma hamutuk 1.030
Jornalista : Felicidade Ximenes
Editór : Zezito Silva
