LIQUIÇA, 27 janeiru 2023 (TATOLI) – Governu liuhosi Vise-Ministru Administrasaun Estatál (MAE) Lino de JesusTorezão, louva ho inisiativa Xefe Suku Maumeta, Postu Administrativu Bazartete Munisipiu Liquiça tanba bele halo jestaun di’ak hodi harii sede suku andar ho de’it orsamentu hamutuk rihun $16. Totál hosi osan ne’e, rihun $12 apoiu hosi Governu no rihun $4 hosi kontribuisaun komunidade nian.
“Ha’u louva tebes ba Xefe Suku Maumeta nia lideransa ne’ebé di’ak bele halibur nia komunidade iha suku laran, maibé la’os ne’e de’it maibé halibur kedan hosi Irlandia, Inglatera, Australia to’o Korea Súl hodi kontribui hodi harii sede suku ida ho andar”, vise ministru dehan bainhira inagura Sede Suku iha Maumeta, sesta ne’e.
Tanba ne’e, nia husu ba povu Maumeta atu hili nafatin nia iha eleisaun suku tanba ema hanesan ne’e mak merese sai lider ba povu no la haree ba kor saida de’it.
Nia dehan durante ne’e Governu apoia orsamentu ba suku hotu iha teritóriu nasionál maibé kada suku ida hetan jata rihun $12 maibé Suku Maumeta jere osan ne’e hodi halo sai andar maske suku seluk halo de’it re-abilitasaun.
“Parabéns Xefe Suku ita boot nia lideransa di’ak duni, halo jestaun ne’ebé di’ak Timor-Leste presiza lider hanesan ita boot”, revela nia.
Iha fatin hanesan Xefe Suku Maumeta Vitor da Silva, agradese ba Governu nia apoiu orsamentu hamutuk rihun $12, nia konsidera montante osan ida ne’e boot tanba ne’e jere ho di’ak atu sede suku bele mós iha kualidade.
“Bainhira Governu nia programa atu apoiu orsamentu ba suku hotu iha Timor-Leste hodi halo re-abilita sede suku, kada suku ida hetan rihun $12 ida ne’e ba ami boot tebes, entaun antes osan Governu nian mai ami, ami nia osan iha konta suku nian hamutuk $3,000, ami hahú halo daudaun no osan rihun $12 hosi Governu nian mai ami aumenta hodi halo de’it”, dehan Xefe Suku ne’e.
Nia konta, antes sede ne’e atu hamrik andar ne’e kontribuisaun hosi fatin barak iha Suku Maumeta laran hanesan kontribuisaun hosi kompaña lokal sira iha Suku laran, funsionariu públiku sira, joven Maumeta oan sira servisu iha Inglatera, uma lisan sira hotu.
“Ha’u agradese ba apoiu sira hotu, agradese mós ba arte marsiál no arte rituál sira hotu, ami nia hamutuk mak harii uma ne’e, uma ne’e pinta ita bele dehan loron haat ou lima, maibé ema hamutuk na’in 300-resin, entaun pinata iha oras haat nia-laran de’it, uma ne’e ami halo durante fulan neen de’it remata ona, ema sira halo uma ne’e la simu osan ida, ami só hola hahan ba badaen sira han”, katak nia.
Tuir nia bainhira harii uma ne’e tomak tanba povu Maumeta no Xefe Suku iha unidade ne’ebé metin. Ho nune’e, totál osan ne’ebé gasta ba harii sede suku ne’e hamutuk rihun $16 inklui osan han no hemu kada loron halo servisu.
Uma ne’e ho modelu andar ida, medida ba uma ne’e 11X7 kompostu hosi kuartu tolu hosi kraik, sala vizita ida no andar leten hosik hanesan salaun.
Jornalista: Hortencio Sanchez
Editór : Zezito Silva
