AMC husu kompañia hadi’a hikas irrigasaun Beigui
COVALIMA, 28 janeiru 2023 (TATOLI) – Administrasaun Munisípiu Covalima (AMC), liuhosi diresaun Planu Dezenvolvimentu Integradu Munisipál (PDIM), atu hadi’a hikas irrigasaun Beigui iha suku Fatuleto, postu administratuvu zumalai ,munisípiu Covalima.
“Maske ema deskoñesidu estraga bee kompañia foin konstrui irrigasaun. Ita-sei iha osan 10% ne’ebé seidauk halo pagamentu ba kompañia tanba ne’e ita husu ba kompaña atu hadi’a bee, ateru kanu ninin no hamoos ita fó hatene ona kompañia,” Diretór PDIM Afonso Nugueira Nahak, relata ba Agência TATOLI,iha resintu AMC, Sukaer laran.
Maske finaliza ona konstrusaun maibé la presijaona atu halo serimónia inaugurasaun tanba komunidade sira uza ona.
“Loron ikus fulan-janeiru ita sei halo monitorizasaun ba projetu sira-ne’e. Irrigasaun Beigui, ita la presiza atu halo inaugurasaun, tanba komunidade uza ona bee, hodi halai natar no kuda modo, ha’u hanoin iha retornu ekonomia uitoan,” nia katak.
Progresu konstrusaun irrigasaun Beigui loloos finaliza ona 100% no halo ona pagamentu 90% ba kompañia no iha tempu badak atu halo tán pagamentu 10% ba kompaña hodi finaliza. Maibé ema deskuñesidu estraga volante bee nian.
Ho nune’e administradór fó ona karta ba administradór postu ho xefi suku sira atu halo koordenasaun ho polísia buka-tuir ema deskoñesidu ne’e.
Nune’e husu ba administradór postu Zumalai ho nia xefe suku sira atu halo sensibilizasaun informasaun ba sira-nia komunidade atu labele estraga volante ne’e.
Projetu konstrusaun irigasaun Beigui ho naruk kilómetru ida ka metru 1000 ne’ebé la uza orsamentu hosi rúbrika kapitál dezenvolvimentu, tinan fiskal 2022, maibé uza orsamentu restu projetu konstrusaun edifísiu postu administrativu Maucatar no rezidénsia Administradór Munisípiu Covalima nian.
Irrigasaun Beigui lokaliza iha postu administrativu Zumalai, suku Fatuleto, konstrui husi kompañia Joel Amor Uni pesoál Lda ho orsamentu $89,406.
Jornalista:Celestina Teles.
Editor: Evaristo Soares Martins
