Liquiça, 27 janeiru 2023 (TATOLI) – Governu liuhosi Ministériu Administrasaun Estatál hamutuk ho Programa Dezenvolvimentu Suku (PNDS) no autoridade lokál inagura Uma Naroman ba Povu (UNP) hamutuk 19 iha Suku Maumeta no Metagou Postu Administrativu Bazartete Munisipiu Liquiça.
Iha inagurasaun ne’e, Vise Ministru MAE Lino de Jesus Torezão, husu ba benefisiáriu sira atu hela iha uma ne’e ho kuidadu tanba ida ne’e mak Governu nia esforsu hodi tau matan ba família kbiit laek sira.
“Uma ne’e uluk naran uma kbiit laek, tanba protesta makas hosi Parlamentu Nasionál mak ita muda fali ba “Uma Naroman ba Povu, ida ne’e programa VIII Governu nian ne’ebé inan aman hetan ona. uma ne’e hela no kuidadu, buat hotu ami prepara hotu ona iha laran, imi ba só lori de’it roupa hatais no hahan buat seluk”, vise ministru dehan bainhira inagura uma hirak ne’e.
Iha biban ne’e, Sekretaria Ezekutivu PNDS Claudinha Soares Pinto, orgullu tebes ba servisu PNDS munisípiu ne’ebé halo servisu ho di’ak tebes bele konklui uma hamutuk 19 ne’ebé konstrui iha tinan 2022.
“Ohi ita inagura uma hamutuk 19, espera katak ita sei inagura tan iha suku sira seluk ne’e, ohin ita festeza suku rua nian, Maumeta iha uma sia no Metagou uma 10”, dehan nia.
Nia subliña totál orsamentu ne’ebé uza hodi konstrui uma hamutuk 19 iha suku rua, kada uma ida ho orsamentu hamutuk rihun $17 no uma 19 ho totál orsamentu rihun $323.
Iha 2022 PNDS konsege halo ona UNP hamutuk rihun-haat iha territóriu nasionál balun konklui ona no balu sei iha prosesu konstrusaun no sei inagura iha tempu besik.
“Tinan ida ne’e PNDS sei kontinua implementa nafatin programa ida ne’e, tanba Governu liuhosi Parlamentu Nasionál aprova orsamentu ba tinan ida ne’e kuaze millaun $25, ho nune’e tinan-tinan tenke harii UNP hodi responde ba ezijénsia komunidade sira nian, tinan ne’e ita sei harii uma ba família vunerável sira iha suku 524”, relata nia.
Iha tinan 2021 PNDS konsege konstrui uma ba família vulnerável iha territóriu nasionál hamutuk 1.254 ne’ebé inagura hotu ona.
Uma antes ne’e ho naran Uma Kbiit Laek (UKL) muda ona naran ba Uma Naroman ba Povu tanba iha fulan hira ba kotuk Prezidente Repúblika promulga ona kuarta alterasaun dekretu lei PNDS nian No. 8/2013 ho númeru alterasaun No 94/2022 hodi transforma naran.
Iha tinan 2023 PNDS sei tau prioridade liu harii UNP ba aldeia sira ne’ebé iha área rurál seidauk asesu ba uma ne’e atu nune’e to’o tinan oin família vunerável hotu iha Timor-Leste maioria bele hetan ona uma ne’e liuhosi orsamentu ne’ebé aprovadu ona.
“Iha tinan ne’e ita la inklui Dili sei harii UNP iha aldeia hamutuk 2025 iha territóriu laran tomak, ho nune’e suku sira ho aldeia barak keta laran taridu sei hetan hotu uma ne’e”, haklaken nia.
Iha oportunidade ne’e, Xefe Suku Maumeta Vitor da Silva lori família vunerável nia naran katak benefisiáriu ba uma 19 ne’e agradese ba Governu liuliu PNDS ne’ebé servisu másimu tebes hodi harii ona uma.
“Lori família sira hotu agradese ba Governu liuliu PNDS ne’ebé servisu másimu tulun ona ita nia família hirak ne’e, ami husu programa ne’e bele la’o nafatin”, katak Vitor.
Fasilidade iha uma ida iha kama tolu, esprinbet, armáriu, meza, kadeira no sasan dapur laran nian.
Jornalista: Hortencio Sanchez
Editór : Zezito Silva
