DILI, 28 janeiru 2023 (TATOLI)-Prezidente Repúblika (PR), José Manuel Ramos Horta, apresia modelu prosesu ensinu ka aprendizajen hosi eskola Irmán Franciscana Missionária Nossa Senhora Laleia, munisípiu Manatuto.
Apresiasaun Xefe Estadu ne’e hato’o bainhira halo vizita ba eskola refere, hodi haree direta prosesu aprendizajen no konstrusaun rezidénsia Irmán Franciscana iha Laleia.
Vizita PR ne’e akompaña hosi Embaixadora Portugál ba Timor-Leste, Manuela Freitas Bairos no Asesór Polítiku Prezidente, Tomás do Rosário Cabral.
Horta agradese tanba prosesu hanorin alunu sira, rejista pasu pozitiva hodi dezenvolve sistema edukasaun Timor-Leste liliu iha área Laleia, Baucau no fatin seluk bele lori oan sira ba aprende matéria oioin.
“Ha’u mai vizita Madre Franciscana iha Laleia, sira apoiu ba edukasaun labarik hamutuk 180 ne’ebé madre sira hosi Portugál hetan apoiu fundu hosi Governu Portugál hodi konstrui uma hanorin ita-nia oan sira,” PR Horta, hateten liu hosi nota imprensa ne’ebé Agência TATOLI asesu, sábadu ne’e.
Rezidénsia ne’e harii iha rai kuaze ektare ida oferese hosi komunidade Laleia no proesu kontrusaun durante ne’e la’o hetan apoia mós hosi Eis Primeiru Ministru, Kay Rala Xanana Gusmão no PR hodi konstrui durante tinan ida fulan haat.
Iha fatin hanesan, Koordenadora Kongregasaun Irmán Franciscana Laleia, Madre Albina sente haksolok tebes ho vizita Prezidente Repúblika no Embaixadora Portugál hodi haree sira nia edifísiu no prosesu aprendizajen.
“Ami agradese ba vizita hosi señor Prezidente Ramos Horta hodi mai haree direita ami-nia fatin no vizita estudante sira iha+ne’e,” madre agradese.
Madre Albina dehan, edifísiu ne’e finaliza ona no sira hahú loke prosesu rejistu no hanorin estudante sira ho matéria edukasaun oioin tuir kurríkulu Portugál no Timor-Leste nian.
Edifísiu moderna komposta hosi koléjiu, sentru formasaun, kampu futsál, jardín halimar ba labarik no rezidénsia komunidade relijioza provínsia portugueza, konstrui hosi arkitetu, Cesar Almeida hosi Empresa CC Construcões Portugál ho totál orsamentu kuaze millaun $1.4
Durante halo observasaun, Ramos Horta hetan esplikasaun direita hosi arkitetu, Cesar Almeida hodi introdús prosesu kontrusaun to’o finaliza obra ne’ebé tuir dezeñu hosi padre sira.
Kompañia ne’e mós harii ona barrajen bee boot iha rai-ku’ak ho kuantidade boot hodi halibur udan-been, atubele utiliza iha tempu bailoron atu rega ai-funan no ai-horis sira ne’ebé sei kuda haleu rezidénsia ne’e iha foho-leten Laleia bele sai matak nafatin.
Tuir planu iha fulan-marsu no abríl tinan ne’e bele halo ona inagurasaun.
Jornalista: Nelson de Sousa
Editór: Evaristo Soares Martins
