Populasaun suku Samalari 3.018 seidauk simu cesta bázika
DILI, 28 janeiru 2023 (TATOLI)– Xefe suku Samalari, postu administrativu Baucau Vila, munisípiu Baucau, Rui Magno Siqueira, fó-sai katak populasaun 3.018 seidauk simu cesta bázika.
“Ita-nia populasaun 3.018 mak seidauk simu cesta bázika maibé nu’udar povu atu dehan ba Governu katak sira fó ami simu tanba hanesan Governu no Estadu iha nia programa tinan-tinan ne’ebé planu no hakarak fó ai-haan nutritivu ba nia povu maibé kuandu mai ona ha’u lori ha’u-nia povu hodi simu,” nia dehan ba Tatoli, liuhosi telefónika, sábado ne’e.
Nia dehan, atu di’ak liután Governu oferese fini ba povu Samalari atubele kuda no hakiak se lae povu dependénsia de’it ba Governu
“Tanba ne’e kuandu ami husu kail fó ami mak kail, labele fó fali ikan tanba ida-ne’e halo povu dependente ba governu no lakohi esforsu atu hetan ai-haan mesak. Maibé fó fini nune’e bele prepara mesak,” nia rekomenda.
Ministériu implementadór ba Cesta Bázika faze daruak ne’e mak Ministériu Turizmu Komérsiu no Indústria ( MTKI ) ho totál millaun $ 40 no Sekretaria Estadu Kooperativa ( SEKoop ) ho totál millaun $ 40.
Produtu ne’ebé admite ba programa ne’e mak produtu ai-haan ne’ebé iha karboidratu, proteína no vitamina.
Jornalista : Osória Marques
Editór: Evaristo Soares Martins
